• 19 қыркүйек 2024
• 690

Қорқыт ата атындағы Қызылорда университетінде жаңа спорттық ойындар алаңы ашылды

Қорқыт ата атындағы Қызылорда университетінің 9 оқу ғимаратында жаңа спорттық ойындар алаңы ашылды. Салтанатты жиынға Басқарма Төрағасы-ректор Бейбіткүл Кәрімова қатысып, университеттің спорт және бастапқы әскери дайындық бағытындағы жетістіктерге тоқталды.

“Бүгінде «Дене шынықтыру және бастапқы әскери дайындық» білім беру бағдарламасы материалдық-техникалық базасы қалыптасып,заман талаптарына сай жабдықталған 3 мультимедиялық қондырғымен, мамандық ерекшелігіне сәйкес дәрісханалар жаңа көрнекілік стендтермен жабдықталған. Сонымен қатарталапқа сай 6 спорт және фитнес залы, 1 жүзу бассейіні, 4 ашық ойын алаңы мен бастапқы әскери дайындық мамандығына арналған саптық алаңмен қамтамасыз етілген. Оқу сабақтарына «Сейхун» спорттық-сауықтыру кешенінің базасын пайдаланады”,-деді Бейбіткүл Сәрсемханқызы.

Қазіргі таңда білім беру бағдарламасында 16 оқытушы-профессор жұмыс жасайды. Оның ішінде: 3 ғылым кандидаты, 2 PhD, 3 магистр, 8 аға оқытушы қызмет атқарады. Жалпы білім беру бағдарламасының контингенті 1346 білім алушыны құрап отыр.

Шара барысында университет чемпиондары алғашқы сапта жүріп өтті. Қазіргі уақытта университетте Әлем чемпионатының 9 жеңімпазы мен жүлдегері, Азия чемпионатының 27 жеңімпазы мен жүлдегері, Қазақстан чемпионатының 120 жеңімпазы мен жүлдегері білім алуда.ХІІ жазғы Универсиаданың қорытындысы бойынша университет спортшылары үздік ондыққа кіріп 37 медаль жеңіп алды. 

Айта кетейік, өткен оқу жылында оқу орнында футбол алаңы қолданысқа берілді.