• 25 қыркүйек 2024
• 555

Дала күнінде ғалымдар жоба нәтижелерін көрсетті

Қорқыт ата университеті ғалымдарының қатысуымен «Дала күні» өтті. Жиын Тасбөгет кентіндегі кәріз суын биотазалау стансасы және ғылыми зерттеу алаңында ұйымдастырылды.

Мамандар «Қызылорда облысында су тапшылығы жағдайында мал азықтық дақылдары мен ағаш екпелерін суару үшін сарқынды суларды қауіпсіз утилизациялау технологиясын әзірлеу» жобасының маңызды нәтижелерін талқылады. 

Шарада университеттің  Басқарма мүшесі-ғылыми және халықаралық байланыстар жөніндегі проректоры Майнұр Бөрібаева ғылым саласындағы нәтижелі жұмыстарға тоқталды. Сонымен қатар, жоба жетекшісі ауыл-шаруашылық ғылымдарының докторы, профессор Серікбай Өмірзақов, химия ғылымдарының кандидаты, профессор-зерттеуші Нұрбол Аппазов, ауыл шаруашылығы ғалымдарының докторы, профессор Асылхан Шомантаев, ауыл шаруашылығы ғылымдарының докторы, қауымдастырылған профессор Ибадулла Таутенов, техника ғылымдарының кандидаты, оқытушы-зерттеуші Шолпан Үмбетова және техника ғылымдарының кандидаты, қауымдастырылған профессор Гүлнар Сыдықова баяндама жасады. Қатысушыларға өздерінің ғылыми зерттеулерін және жобаның аймақ үшін маңыздылығын таныстырды.

“Кәріз жүйесінен шыққан лас суларды 25 куб.шаршы метр сыйымдылығы бар бөшкеге жинап, белсендірілген көмір арқылы тазартылған суды тұндырып, арнайы құбырлар арқылы алаңға суаруға жібереміз. Міне, осындай кешенді ауқымды жоба”,-деді Серікбай Өмірзақов.

Жоба аясында бейімделген ағаштардың екі сорты-шаған мен ясин егіліп, жасыл желек саны артуына септігін тигізуде. 1 гектар жер игеріліп, еккен ағаштардың 70-75 %-ы өсіп шықты. Сондай-ақ, мал азықтық және бақша дақылдары тәжірибеден өтуде.

Іс-шара барысында қатысушылар тәжірибелік аймақта жүргізілген жұмыстармен танысып, ғылыми-эксперименталдық құрылғылар көрмесін тамашалады.