• 02 қазан 2024
• 269

Жоғары білім қызметкерлерінің кәсіби мерекесі өтті

Қорқыт ата атындағы Қызылорда университетінде 1 қазан -Қазақстан Республикасының жоғары білім қызметкерлері күні және халықаралық қарттар күніне арналған салтанатты жиын өтті. Мерекелік шарада Басқарма Төрағасы-ректор Бейбіткүл Сәрсемханқызы университет ұжымын атаулы мерекемен құттықтап, оның маңыздылығын атап өтті.

“Ел ғылымы мен білімінің қарқынды түрде дамуына айрықша әсер ететін қозғаушы күш - жоғары білім десек, бұл мерекенің баршамыз үшін орны бөлек. Оқу орнының табысқа жетуі – ұжымның бірлігінің нәтижесі. Біз мықты мамандарды, ғалымдарды ұстап қалу үшін оларды әлеуметтік қолдаудың аясын одан әрі кеңейте береміз”, - деді Бейбіткүл Кәрімова.

Қазіргі таңда университет қызметкерлерінің нақты саны 1120 штат бірлігін құрайды. Оның ішінде профессор-оқытушы құрамы – 546, оқу-көмекші персонал – 170, әкімшілік персонал – 56, өзге де персонал – 348. 

Университет бюджеті соңғы бес жылда 2,3 есеге артты. 2020 жылдан инфрақұрылымды дамытуға бөлінген қаржы көлемі 9 еседен астам өсіп, 2024 жылы 1 млрд теңгеге жуықтады. Қаржылық жағдайдың тұрақты түрде өсуі арқылы кейінгі 4 жылда профессор-оқытушылар құрамының еңбекақысы 3 еседей, ал қалған қызметкерлердің еңбекақысы 2 еседен астам көтерілді.

2024-2025 жылдары ғылыми дәрежесі бар оқытушылардың үлесі 51 пайызды құрады. Ғылыми дәрежесі бар профессор-оқытушы құрамы мен университет қызметкерлерінің орташа жасы – 46 жасты құрайды.

Оқу орны инновациялық-кәсіпкерлік жоғары оқу орны ретінде қайта құру ісінде, инфрақұрылымды жанарту, бизнес-процестерді цифрландыру, басқару жүйесі мен НR-процестердің тиімділігін арттыру, халықаралық байланыстарды нығайту, ғылыми әлеуетті арттыру және кәсіби бағдар беру жұмыстарын ұйымдастырудағы көптеген бастамаларымыз табысты нәтижелер көрсетуде.
Салтанатты шарада университеттің стратегиялық дамуына зор үлес қосып, сапалы маман тәрбиелеу жолында аянбай еңбек етіп жүрген бірқатар қызметкер марапат төрінен көрінді. 

Жиынға зиялы қауым өкілдері, университет ардагерлері, профессор-оқытушылар, университет қызметкерлері мен  білім алушылар қатысты. Салтанатты шара мерекелік концерттік бағдарламамен қорытындыланды.