• 11 қазан 2024
• 283

Профессор Күлдірсін Сарышованың 60 жас мерейтойына арналған республикалық конференция өтті

Қорқыт ата атындағы Қызылорда университетінде тілтанушы ғалым, филология ғылымдарының кандидаты, қауымдастырылған профессор Күлдірсін Сарышованың 60 жылдық мерейтойына арналған «Қазіргі ғылым парадигмасындағы қазақ лингвистикасы: таным, сөз мәдениеті және педагогикалық дискурс» тақырыбында республикалық ғылыми-теориялық конференция өтті.

Жиынға университеттің профессор-оқытушылары, мерейтой иесінің шәкірттері, білім алушылары мен БАҚ өкілдері, қонақтар қатысты. Республикалық конференцияда ғалымның еңбектері сараланып, ғылымға қосқан үлесі айтылды.

Конференция барысында Қорқыт ата атындағы Қызылорда университетінің  Қазақ тілі мен әдебиеті және журналистика БББ-ның профессоры, филология ғылымдарының кандидаты Ғабит Тұяқбаев, Әл-Фараби атындағы Қазақ ұлттық университетінің профессоры, филология ғылымдарының  докторы Гүлдархан Смағұлова, Әл-Фараби атындағы Қазақ ұлттық университетінің доценті, филология ғылымдарының  докторы Алтынай Тымболова, І.Жансүгіров атындағы Жетісу университетінің қауымдастырылған профессоры, филология ғылымдарының кандидаты Гүлнар Сырлыбаева баяндама оқыды.

Күлдірсін Сейтжанқызы – Қорқыт ата атындағы Қызылорда университетінде 1995 жылдан бастап оқытушылық қызмет атқарып келеді. Қазіргі таңда Қазақ тілі мен әдебиеті және журналистика БББ-ның аға оқытушысы. 

Ғалымның 3 монографиясы, 2 ғылыми-танымдық тарихи кітабы, 2 оқу құралы, 1 сөздігі және 1 естелік кітабы, 10 оқу-әдістемелік кешені және 80-ге  жуық  ғылыми мақалаласы отандық және шетелдік басылымдарда жарық көрген.

Ғылым және білім саласындағы елеулі еңбегі үшін облыс әкімінің, ҚР ЖОО қауымдастығы Президентінің Алғыс хатымен, Ғылым және жоғары білім министрлігінің «Тіл жанашыры» атты Құрмет дипломымен марапатталған.

Жиында Күлдірсін Сейтжанқызы облыс әкімінің Құрмет грамотасымен, білім мен ғылым саласындағы елеулі еңбегі үшін «Ахмет Байтұрсынов» атындағы алтын медалімен марапатталды. Сонымен қатар, Ғылыми жұмыстар және халықаралық байланыстар жөніндегі проректор Майнұр Бөрібаева Әл-Фараби атындағы Қазақ ұлттық университетінің профессоры, филология ғылымдарының  докторы Гүлдархан Смағұловаға университетпен стратегиялық байланыс орнатып, бірлескен жұмыстарды нәтижелі атқарғаны үшін «Қорқыт ата атындағы Алтын медаль» табыстады.

Жиын соңында сөз алған қонақтар, ғалымның шәкірттері мен әріптестері ізгі тілегін білдіріп, естелік суретке түсті.