Қорқыт ата атындағы Қызылорда университеті студенттерінің білім алумен қатар, жан-жақты дамуына басымдық береді. Бұл орайда университет пен «Білім Ыбырай» қоғамдық қорының серіктестігі үлкен рөл атқарады. Қор студенттерді кәсіби, тұлғалық, әлеуметтік және тілдік бағытта қолдап, олардың болашақта білікті маман болуына жағдай жасайды. Қазіргі уақытта қордың қолдауымен Қорқыт ата университетінің 110 студенті білім алуда.

16 қазан күні «Білім Ыбырай» қоғамдық қорының ұйымдастыруымен IV дәстүрлі «Ұстаз – ұлт келбеті» атты гала-концерт өтті. Іс-шараға Қызылорда қалалық 7 – шақырылымның депутаты, кәсіпкер Дінмұхамед Абизов, Қорқыт ата атындағы Қызылорда университетінің «Әлеуметтік және тәрбие жұмыстары» басқармасының басшысы Жанар Бимұратқызы, қоғамдық қордың демеушілері, жергілікті кәсіпкерлер, БАҚ өкілдері және білім саласының белсенділері қатысты.

Кештің ең басты сәті – «Жыл студенті-2024» байқауының жеңімпаздарын мараппатау болды. Бұл атаққа Қорқыт ата университетінің «Ыбырай» педагогикалық ұйымының төрағасы, АЯ-23-7 тобының студенті Шамиль Анарбай ие болып, оған MacBook пен ауыспалы статуэтка табысталды. Екінші орын иегері Б-23-1 тобының студенті Айдана Тамабай Apple iPad сыйлығын алды, ал үшінші орынға М-23-1 тобының студенті Қабыл Дүйсек қол жеткізіп, Apple Watch сыйлығын иеленді.

Сонымен қатар, Instagram желісі арқылы ең көп лүпіл жинаған АЯ-22-5 тобының студенті Айша Аубакир «Көрермен көзайымы» номинациясына ие болып, 50 мың теңге көлемінде ақшалай сыйлық алды. Үздік ондыққа кірген 7 студентке арнайы сыйлықтар мен KitapAl дүкенінен 5 мың теңгелік сертификаттар табысталып, Aipatcha контент студиясының директоры Ғани Болатұлының атынан 30 мың теңгеден қаржылай қолдау көрсетілді. Белсенді студенттер де арнайы марапаттарға ие болды.

Бұл іс-шара Қорқыт ата атындағы Қызылорда университетінің студенттерінің жетістіктерін көрсетіп, олардың шығармашылық және кәсіби дамуына үлкен серпін берді. Университет пен қоғамдық қордың тығыз байланысы студенттердің жан-жақты қалыптасуына зор мүмкіндік тудырды.