• 07 қараша 2024
• 552

Қорқыт ата университетінің студенті Әлем чемпионатында қола жүлдегер атанды

Қорқыт ата атындағы Қызылорда университетінің 2 курс студенті, болашағынан үміт күттіретін жас спортшы Аслан Елдібайұлы Черногорияда өткен жастар арасындағы бокстан Әлем чемпионатында қола медаль жеңіп алды. Асланның бұл жеңісі – оның ғана емес, университет ұжымы мен барша қазақ елі үшін үлкен мақтаныш.

Черногорияның Будва қаласында өткен дүбірлі додаға әлемнің 73 мемлекетінен 600-ге жуық спортшы қатысты. Әлемдік аренада өнер көрсеткен жастар өздерінің шеберліктерін паш етіп, әр елдің намысын қорғады. Аслан аса ауыр салмақ дәрежесінде ел намысын қорғай отырып, жекпе-жектерін жоғары деңгейде өткізді. Шаршы алаңдағы алғашқы кездесуінде ол қытайлық Жанг Даны екінші раундта нокаутқа түсіріп, өзінің шеберлігін дәлелдеді. Екінші кездесуде өзбекстандық Джафарбек Шахбазовты айқын басымдықпен жеңіп, жартылай финалға жолдама алды.

Жартылай финалдық кездесуде Аслан қола жүлде үшін жан аямай күресіп, жүлделі орынға лайықты екенін дәлелдеді. Осылайша, Аслан Елдібайұлы бокстан жастар арасындағы Әлем чемпионатының қола жүлдегері атанды. Бұл – оның халықаралық аренадағы алғашқы жетістігі емес. Бұған дейін де жас спортшы жасөспірімдер арасындағы Азия чемпионатында күміс медаль алған болатын.

Университет ұжымы мен барлық студенттер Асланды жеңісімен құттықтап, оған алдағы жарыстарда жаңа жетістіктер тілейді.