• 15 қараша 2024
• 340

Студенттік халық аспаптар оркестрінің тұсаукесер концерті өтті

Қорқыт ата атындағы Қызылорда университетінің «Педагогика және дәстүрлі өнер» институтының студенттері алғаш рет халық аспаптар оркестрімен сахнаға шықты. Тұсаукесер концерті 17-қараша – Халықаралық студенттер күніне орай ұйымдастырылып, университеттің мәдени өміріне жаңа серпін берді. Мәдени кеште  Басқарма Төрағасы – Ректор Бейбіткүл Каримова жылы лебізін білдіріп, жаңа бастаманың маңыздылығын атап өтті.

Оркестрдің дирижері – Қазақстанның еңбек сіңірген қайраткері, профессор Кеулімжай Шалтақбайұлы. Оның жетекшілігімен оркестр ұлттық өнердің жауһарларын жаңа қырынан жеткізді. Концерт бағдарламасы халық музыкасының көрнекті туындыларымен толықты. Түркештің «Көңілашар» күйі мен Нұрғиса Тілендиевтің «Ата толғауы» шығармасы оркестрдің орындауында тыңдармандардың жүрегіне терең сезім сыйлады.

Сонымен қатар, Шәмші Қалдаяқовтың «Қайдасың» әнін 3-курс студенті Ақерке Шәкетқызы нәзік әуезбен орындаса, Құрманғазының «Балбырауын» және «Адай» күйлері студенттердің шабытты орындауында ұлттық рухты асқақтатты. Латиф Хамидидің «Қазақ вальсі» шығармасын 4-курс студенті  Аяулым Молдабекқызы әсерлі орындап, тыңдармандарды ерекше әсерге бөледі.

Бұдан бөлек, Төлеген Мұхамеджановтың «Махаббат бекеті» шығармасы мен Дәулеткерейдің «Көрұғлы» күйі оркестрдің орындауында толғандырып, Ержан Тоқсабановтың «Жауға» туындысын орындаған квартет патриоттық рухты сезіндірді. Абайдың «Көзімнің қарасы» әнін 4-курс студенті Ернұр Серғазы көрермендерді ерекше сезімге бөлесе, Әбдімомын Желдібаевтың «Ерке сылқым» күйі де терең тебіреніс сыйлады.

Концерт барысында 3-курс студенті Нұрхан Ақын  Мурад Кажлаевтың «Долалай» шығармасын орындап, Е.Доганың «Мой ласковый и нежный зверь» фильмінен алынған вальсті 2-курс студенті  Нұралы Бакишев баянмен әсерлі жеткізді. Сонымен қатар, Шәмші Қалдаяқовтың «Сыған серенадасы» әнін 3-курс студенті  Айтоғай Жапақов квинтет сүйемелдеуімен жоғары тдеңгейде орындап шықты.

Концерттің соңында Нұрғиса Тілендиевтің «Әлқисса» шығармасын 4-курс студенттері  Нұрдаулет Қыдырбай пен  Ғазиз Шералиев орындап, шара Құрманғазының «Сарыарқа» күйімен қорытындыланды. Осылайша, студенттер ұлттық өнерге деген құрметін, шығармашылық қабілеттерін айқындап, Қорқыт ата университетінің мәдени өміріне тың серпін сыйлады.