• 20 қараша 2024
• 152

«ХХІ ғасырдағы Алаштың Ақ жолы» жалпыұлттық байқауының ІІ кезеңі қорытындыланды

Қорқыт ата атындағы Қызылорда университетінде «Ақ жол» демократиялық партиясының дәстүрлі «XXI ғасырдағы Алаштың Ақ жолы» жалпыұлттық байқауының ІІ кезеңі өтті.

Байқауға Л.Н.Гумилев атындағы ЕҰУ Қазақ әдебиеті кафедрасының профессоры Қайырбек Кемеңгер, Қорқыт ата атындағы Қызылорда университетінің «Шоқайтану» орталығының жетекшісі Сағат Тайман және “Адырна” ұлттық порталының жетекшісі Арман Әубәкір қазылық етті.

Шарада Қорқыт ата атындағы Қызылорда университеті Басқарма мүшесі – Ғылыми жұмыс және халықаралық байланыстар жөніндегі проректорі Майнура Бөрібаева, «Ақ жол» партиясының төрағасы Азат Перуашев, ҚР Парламенті Мәжілісі «Ақ жол» фракциясының аппарат жетекшісі Берік Дүйсембинов, партияның Орталық аппаратының басшысы Асылхан Қожахметов сөз сөйледі.

Еліміздің түкпір-түкпірінен келген 41 қатысушы «Алаш қайраткерлерінің алаш республикасының мемлекеттік құрылымы туралы идеясы және оның қазіргі Қазақстан үшін өзектілігі», «Алаш қайраткерлерінің оқу-ағарту мен ғылымдағы ұстанымы және оның қазіргі қазақстан үшін маңызы», «Алаш қайраткерлерінің экономикалық көзқарасы және кәсіпкерлікті дамыту», «Алаш республикасы – алдыңғы қазақ ұлттық мемлекеттері мен қазіргі тәуелсіз қазақ елінің тарихи, рухани және заңнамалық сабақтастығын жалғайтын көпір» номинациясы бойынша бақ сынап, 14 қатысушы ақтық кезеңге жолдама алды.

Гуманитарлық-педагогикалық институтының студенттері Сұңғат Диярша мен Динара Ерханқызы жобаларын үздік қорғап, жоба қорытындысы бойынша Сұңғат Дияршаға Алғыс хат және қаржылай сертификат табысталды. Динара Ерханқызының жобасы үздік атанып, Қарағанды қаласында өтетін байқаудың III кезеңіне жолдама алды.

Еске сала кетейік, байқау биыл он үшінші рет ұйымдастырылды. Байқаудың екінші кезеңін еліміздің әр аймағында өткізу дәстүрге айналған. Бұған дейін Семей, Алматы, Қостанай, Қарағанды, Ақтөбе, Тараз, Астана, Ақтау, Орал, Шымкент қалаларында өтті.

 Қорқыт ата атындағы Қызылорда университетінің медиа орталығы