• 09 желтоқсан 2024
• 366

Жансая Қоңырбаева: Кореядағы білім мен болашаққа ұмтылыс

Қорқыт ата атындағы Қызылорда университетінің студенті Жансая Қоңырбаева Оңтүстік Кореяда білім алуда. Ол шетелдік білім беру жүйесінің артықшылықтарын көріп, халықаралық деңгейде білім алудың маңыздылығын терең түсінгенін жеткізді.

“Оқудың жоғары деңгейіне көзім жетті. Бізге сабақ беретін оқытушылар – білікті мамандар, олардың әр сабағы қызықты әрі түсінікті өтеді. Оқу бағдарламасы өте сапалы, менің мотивациямды одан әрі арттырып, өзімді жетілдіруге ынталандыруда,” – деп бөлісті.

Жансаяның студенттік өмірі де қызыққа толы. “Таңертең ерте тұрып, сабақтарымды қайталаймын. Көп жағдайда сабақтар түстен кейін басталады, ал кешке достарыммен уақыт өткіземін. Мұнда кәріс халқының мейірімділігі мен кеңпейілділігі ерекше байқалады,” – дейді.

Ол шетелде білім алу өзінің көзқарасын өзгерткенін атап өтті. “Жауапкершілікті сезіну, уақытты тиімді басқару, дисциплина – осының бәрі менің өмірімде үлкен рөл атқаруда. Сонымен қатар, тілге деген құрметім артып, жаңа ақпаратты үнемі іздеп, жаңашылдыққа бейім бола бастадым,” – деді Жансая.

Жансая болашақта тағы да Кореяда оқуды жоспарлап отыр. “TOPIK емтиханын тапсырып, кәріс тіліндегі деңгейімді одан әрі арттырғым келеді. Бұл оқу мансабым маған үлкен мотивация берді. Басқа елдерде де оқуға мүмкіндігімнің артуы үшін білімімді тереңдетуге тырысамын,” – деп алға қойған мақсаттарымен бөлісті.

Студент шетелде жүрсе де, өз еліне деген мақтанышын жоғалтпаған. “Кәрістер бізді тазайым, мейірімді, қонақжай халық деп жоғары бағалайды. Өз еліңнің құрметке ие болғанын есту – зор мақтаныш,” – деп кейіпкеріміз өз сұқбатын қорытындылады.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru