• 10 желтоқсан 2024
• 454

Республикалық пікірсайыс турнирі өтті

Қорқыт ата атындағы Қызылорда университетінде «Qorqyt Ata CUP II: Ұлттық сана – ұлт руханиятының негізі» атты республикалық пікірсайыс турнирі ұйымдастырылды. Ауқымды шараға Астана, Шымкент, Түркістан, Тараз және Қызылорда өңірлерінен 11 команда қатысты. Тартысты додада пікірсайысшылардың шешендік шеберліктері мен терең білімдері сыналды.

Турнирдің ашылу салтанатында Әлеуметтік және тәрбие жұмыстары жөніндегі проректор Жандос Базартай алғыс сөз сөйлеп, «Qorqyt Ata CUP II» пікірсайыс турнирі жастардың сыни ойлау қабілетін дамытуға, білімдерін тереңдетуге және өзара тәжірибе алмасуға үлкен мүмкіндік беретінін атап өтті. Сонымен қатар, бұл турнир жастардың жаңа идеяларын қалыптастырып, ұлттық сананы терең түсінуге ықпал ететініне сенім білдірді.

Турнирге өңірімізде пікірсайыс саласында мол тәжірибесі бар кәсіби мамандар шақырылды. Бас төреші қызметін Ұлттық пікірсайыс федерациясының Қызылорда облысы бойынша директоры Айжан Орынбасарова атқарды.

Республикалық турнирде “Қазақстан Республикасында құмар ойындардың барлық түрлеріне (лотереялар, букмекерлік кеңселер, казино) тыйым салу”, “Қазақ жастарының ең үздік жетістігін көрсету”, “Қазақ халқының заманауи салт-дәстүрін ұсыну”, “Әлімжеттікпен (буллинг) күресудің жаңа шешімдерін әзірлеу” “ХХІ ғасырдың ең басты қателігін көрсету” және өзге де қоғамдағы өзекті әрі маңызды тақырыптар қозғалды.

Нәтижесінде Мұхтар Әуезов атындағы Оңтүстік Қазақстан университетінің «Нартай Бекежанов» фракциясы - І орын, Қожа Ахмет Ясауи атындағы Халықаралық қазақ-түрік университетінің «Нағи Ілиясов» фракциясы - ІІ орын,  Мұхтар Әуезов атындағы Оңтүстік Қазақстан университетінің «Тұрмағанбетов Ізтілеуов» фракциясы - ІІІ орын иеленді.

Бұдан бөлек, «Үздік төреші» атағына Маржан Ердібек лайық деп танылса, тараздық Азамат Тоқбергенге «Үздік спикер» номинациясы табысталды.

Жеңімпаздарды марапаттау рәсімінде Ғылыми жұмыстар және халықаралық байланыстар жөніндегі проректор Майнура Бурибаева қатысушылардың білім мен ұлттық сананы қалыптастырудағы рөліне ерекше тоқталып, жүлдегерлерді құттықтады.

Айта кетейік, «Ақиқат» дебат клубы – Қорқыт ата атындағы Қызылорда университеті  студенттерінің  шығармашылығы мен шешендік қабілеттерін дамытатын жетекші ұйымдарының бірі.  Клубтың басты мақсаты – жастар арасында сөз мәдениеті мен жүйелі ойлауды қалыптастыру арқылы интеллектуалдық қабілеттерді арттыру, қоғамға өзекті мәселелерді талдау арқылы шешім табуға бейімделген тұлғаларды тәрбиелеу.

Дебат клубы 20 жылдан бері жұмысын үздік атқарып келеді. Тек университет деңгейінде емес, облыс мектептерімен де тығыз байланыс орнатып, филиалдар ашу арқылы пікірсайыс мәдениетін аймақ жастары арасында кеңінен насихаттауда. Ұйым мүшелері республикалық және халықаралық пікірсайыс турнирлерінде жүлделі орындарға ие болып, университет намысын абыроймен қорғап жүр.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru