• 20 желтоқсан 2024
• 141

Анар Ізденнің “Зёрна граната” өлеңдер жинағы таныстырылды

Қорқыт ата атындағы Қызылорда университетінде белгілі ақын және қоғам қайраткері Анар Ізденнің “Зёрна граната” атты өлеңдер жинағының таныстырылымы өтті. Шараны университеттің ғылыми жұмыстар және халықаралық байланыстар жөніндегі проректоры Майнура Бурибаева жүргізді. Іс-шараға университеттің оқытушылары мен студенттері қатысты.

Анар Ізден – Қызылорда облысының үкіметтік емес ұйымдар Альянсының төрайымы, әлеуметтік жобалардың жетекшісі, сондай-ақ “Умай” балалар үйінің негізін қалаушы. Журналистік қызметін республикалық “Горизонт” газетінде бастаған ақын аудармашылық саласында да жемісті еңбек еткен. Ол Шерхан Мұртазаның мақалаларын және Сейсен Мұхтарұлының поэзиясын қазақ тіліне аударған.

Әдебиетке деген сүйіспеншілігінің арқасында оның қаламынан 200-ден астам өлең, 10 әңгіме және 5 пьеса дүниеге келді. Ақынның шығармалары адамзаттың рухани құндылықтарын, табиғатпен үйлесімін және қоғамның өзекті мәселелерін жырлайды.

“Зёрна граната” жинағы ақынның әр жылдары жазылған шығармаларын қамтиды. Орыс тілінде жарық көрген жинақ бес бөлімнен тұрады. Әр бөлімде терең ой, нәзік лирика және поэзияның көпқырлылығы айқын көрініс тапқан. Бұл туындылар махаббат, табиғат, адам мен қоғамның өзара байланысы туралы сыр шертеді.

Жиын барысында қатысушылар ақынның шығармашылығымен жақынырақ танысып, оның поэзиясының рухани мазмұны мен терең ойлары туралы пікір алмасты.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru