• 06 наурыз 2025
• 234

Алғаш рет отандық әйел-ғалымдарға арналған академик Н.Базанова атындағы марапат табысталды

Алматы қаласындағы Ғылым ордасында Қазақстан Республикасының Ұлттық ғылым академиясының ұйымдастыруымен алғаш рет отандық әйел-ғалымдарға арналған академик Н.Базанова атындағы  марапаттың салтанатты табыстау рәсімі өтті.

Базанова Найля Оразғұлқызы (1911-1993) - Қазақстан мен Орталық Азиядағы алғашқы әйел-академик, биология ғылымының жаңа саласының - ауыл шаруашылығы жануарларының физиологиясының негізін қалаушы. Ол қазақ әйелдері арасынан шыққан тұңғыш биология ғылымының докторы, профессор, Қазақ КСР ғылым академиясының академигі , Қазақстанның еңбек сіңірген ғылыми қайраткері. 

Тұңғыш отандық әйел-ғалымдарға арналған марапатпен 48 отандық ғылымның дамуына айрықша үлес қосып жүрген, ғылыми әлеуеті жоғары, ғылымның әртүрлі бағыттарында үздік нәтиже көрсеткен, жетекші әйел-ғалымдар мен ғылыми қызметкерлер салтанатты түрде марапатталды. Олардың қатарында оқу орнының «Биология, география және химия» білім беру бағдарламасының  профессор-зерттеушісі Анипа Тапалова бар. 

Ғалымның Wef of Science халықаралық базасында 6 мақаласы, ал Scopus халықаралық базасында 10 мақаласы жарық көрген.  Анипа Сейдалықызы 2024 жылдың қорытындысы бойынша республикалық «Жоғары оқу орнының үздік оқытушысы» байқауының жеңімпазы атанды.  

Қазіргі таңда елімізде ғылыммен айналысып жүрген зерттеуші мамандар арасындағы әйелдер саны 12 мыңға жуық. Өткен жылы қазақстандық әйелдер Web of Science және Scopus журналдарында 3100-ден астам мақала жариялады. 

Салтанатты шараға отандық ғылымды дамытуға айрықша үлес қосқан 400-ге жуық  жетекші әйел-ғалымдар, ғылыми қызметкерлер, оқытушылар мен жоғары оқу орындарының, ғылыми ұйымдардың басшылары қатысты.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru