• 09 қазан 2025
• 162

Алтын күз: жылыжайда көкөніс жинау басталды 

Ботаникалық бақ және жылыжай шаруашылығындағы маусымдық жұмыстар алғашқы жемісін берді. Жалпы жылыжайдан агроөнім жинаудың университет үшін маңызы зор. Біріншіден, білім ордасы асханаларының ас мәзірі химиялық қоспасыз өскен таза көкөніспен толығады. Сонымен қатар университет қызметкерлеріне балғын қияр мен қызанақты нарық бағамынан төмен бағада сатып алуға мүмкіндік жасалады.  Екіншіден, студенттерді еңбекке баулумен қатар олардың агроғылымға деген қызығушылығын оятады. Сондай-ақ, оқытушыларға оқу процесін нақты тәжірибемен ұштастырып өткізуге мүмкіндік туады. Сондықтан  жылыжай жобасы дұрыс жолға қойылса, жақсы нәтиже берері сөзсіз.

Жылыжайда жылына 2 рет өнім алуға болады. Мұны бастаудағы мақсат – қол¬данбалы ғылымды дамыту, дуальды оқыту тех¬нологиясын жүзеге асыру. Алдағы уақытта жабық егіс алқабында банан секілді тропикалық жемістерді өсіру жоспарланып отыр.  

Қорқыт ата атындағы Қызылорда университетінің Ботаникалық бақ және жылыжай шаруашылығында жаңа егіс маусымына дайындық және көкөніс көшеттерін отырғызу жұмыстары қарқынды түрде жүргізілді. 1–17 тамыз аралығында жылыжайларды жаңа маусымдағы егіс жұмыстарына дайындау шаралары атқарылды. Ал 18–22 тамыз күндері аралығында түрлі көкөніс көшеттері отырғызылды: қиярдың Хойрат, Пикалино, Мелен F1 сорттарынан 360 түп, қызанақтың Белле, Бельфорт, Лиденза, Махитос F1 сорттарынан 595 түп, тәтті бұрыштың Светофор F1 сортынан 130 түп көшет егілді. Сонымен қатар 8113 тұқым сортынан бірден жерге 510 түп қияр отырғызылды.

25 тамыз – 18 қыркүйек аралығында көшеттерді күтіп-баптау, гидропоника қапшықтарын даярлау, сондай-ақ Ботаникалық бақ аумағын тазалау, ағаштарды кесу, шөп шабу және талдарды қысқы маусымға тыңайтқыштармен қоректендіру жұмыстары жүргізілді. 19–23 қыркүйек күндері гидропоника тәсілімен №1 жылыжайға 360 түп қияр отырғызылды. Ал №2 және №3 жылыжайларға 595 түп қызанақ, 130 түп бұрыш және 510 түп қияр көшеттері егілді.

Алдағы уақытта да университеттің Ботаникалық бақ және жылыжай шаруашылығы ұжымы көкөніс өндірісін дамытып, тың агротехнологияларды енгізу арқылы жаңа жетістіктерге жетуді мақсат етеді.

Корқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_2022@korkyt.kz