• 17 қазан 2025
• 63

Университет ғалымдары «ҚЫЗЫЛОРДАНЫҢ АСТАНАЛЫҚ КЕЗЕҢІ: ТАРИХ ПЕН ТАҒЫЛЫМ» атты республикалық ғылыми-тәжірибелік конференцияға қатысты

Жиында Ақмешіттің астана болған кезеңі, «Қазақ» атауының қайтарылуы, шаһар атының «Қызылорда» болып өзгеруі секілді маңызды тарихи шешімдер қабылдаудағы ұлт зиялыларының еңбегі турасында тың деректер айтылды.    

Қорқыт Ата атындағы Қызылорда университетінің профессоры, филология ғылымдарының кандидаты Ғабит Тұяқбаев облыстық мемлекеттік архивте сақталған ұлт зиялыларының қолтаңбасы қалған құжаттар жөнінде кеңінен баяндап өтті.  

Ғасыр бедерінде Сыр өңірінің кешегісі мен бүгінінен сыр шертетін деректі фильмдер түсіріліп, көрерменге ұсынылды. Айтулы мереке қарсаңында Қызылорданың кейінгі 100 жылдық тарихына арналған кітап жарық көрді. 

«ҚЫЗЫЛОРДАНЫҢ АСТАНАЛЫҚ КЕЗЕҢІ: ТАРИХ ПЕН ТАҒЫЛЫМ» атты республикалық ғылыми-тәжірибелік конференцияның материалдар жинағын әзірлеуге аймақтың басты білім ордасының ғалымдары сүбелі үлес қосты. Университеттің Басқарма Төрағасы-Ректоры Бейбіткүл Каримова мен Ғылыми жұмыстар және халықаралық байланыстар жөніндегі проректоры Майнура Бурибаева редакциялық алқа және ұйымдастыру комитеті құрамына енді. 

Ұлт зиялыларының тұлғалық ұстанымы, халық ағарту институттарының жаңғыруы жинақталған құнды туындының жарыққа шығуы  - өткенге тағзым ететін ұлттың өзін-өзі тану үдерісінің бір көрінісі іспетті. 

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru