• 30 қазан 2025
• 86

Студенттер испаниялық зауытта өндірістік тәжірибеден өтеді

Қорқыт ата атындағы Қызылорда университетіне «Roca Group» компаниясының директоры Даниэль Эрнандес жұмыс сапарымен келді.
Испаниялық компания өкілін Әлеуметтік және тәрбие жұмыстары жөніндегі проректор Жандос Базартай мен Стратегиялық даму және IT жөніндегі проректор Мұрат Айтимов қарсы алды.

«Roca Group» компаниясының директоры Даниэль Эрнандес ҚР еңбек сіңірген гидротехнигі М.Нәлібаев атындағы су шаруашылығы музейі, «Физика-химиялық талдау әдістері» инженерлік бейіндегі зертхана және Жасанды интеллект институтының жұмысымен танысты. Шетелдік іскер топ өкілдері оқу орнының материалдық-техникалық әлеуетіне жоғары баға берді.  
Еуропалық компания Қызылорда қаласында сантехникалық жабдықтар шығаратын жаңа зауыт салуды жоспарлап отыр. Құрылыс материалдарын өндіретін бұл комбинат Орталық Азиядағы ең ірі өндіріс орындарының бірі болмақ. Ұзақ мерзімді серіктестік аясында зауытқа қажетті инженерлік мамандар Қорқыт ата университетінің түлектерінен жасақталмақ.

Бұған дейін «Roca Group Kazakhstan» компаниясының өкілдері университетпен әріптестіктің болашағына сенім білдіріп, білім грантын бөлуге дайын екенін жеткізген болатын. Сонымен қатар университеттің техникалық мамандықтарда оқитын студенттеріне өндірістік нысанда тәжірибеден өтуге мүмкіндік жасалады.