• 09 қаңтар 2026
• 93

«Сергектік және денсаулық – 2026» спартакиадасы өз мәресіне жетті

Қорқыт ата атындағы Қызылорда университетінде «Сергектік және денсаулық – 2026» дәстүрлі спартакиадасының 50 жылдық мерейтойына арналған жабылу салтанаты өтті. Университеттің профессор-оқытушылар құрамы мен қызметкерлері арасында ұйымдастырылған спорттық дода биыл ерекше мәнге ие болды.

Турнир жеңімпаздарын марапаттау рәсімінде Стратегиялық даму және IT жөніндегі проректор Мұрат Айтимов алғысөз сөйлеп, қатысушыларды мерейлі жеңістерімен құттықтап, салауатты өмір салтын насихаттаудағы белсенділіктерін атап өтті.

Жарысқа 6 команда қатысып, 8 спорт түрінен бақ сынады. Қатысушылар шахмат, үстел теннисі, арқан тарту, жүзу, волейбол, тоғызқұмалақ, пневматикалық мылтық ату және футзал сайыстарында өз шеберліктерін көрсетіп, ұйымшылдық пен спорттық рухты дәріптеді.

Апта бойы өткен тартысты сайыстар нәтижесінде жалпыкомандалық есеп бойынша Инженерлі-технологиялық институты бірінші орынды, Жаратылыстану институты екінші орынды, ал Педагогика және дәстүрлі өнер институты үшінші орынды иеленді. Жеңімпаздарға арнайы дипломдар мен кәсіподақ комитеті атынан ақшалай сыйлықтар табысталды.

Салауатты өмір салтын қалыптастыруды мақсат еткен елу жылдық тарихы бар дәстүрлі спартакиада университет ұжымының сергектігін арттырып, спортқа деген қызығушылығын күшейтуге үлес қосып келеді.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru