• 19 наурыз 2026
• 61

Қорқыт ата университетінде халықаралық патенттеу және жобаларды коммерцияландыруға арналған онлайн семинар өтті

Қорқыт ата атындағы Қызылорда университетінде «Ғылыми әзірлемелерді халықаралық патенттеу және жобаларды коммерцияландыру» тақырыбында онлайн семинар ұйымдастырылды.
Іс-шара университеттің сұранысы негізінде Қазақстан Республикасының Ұлттық зияткерлік меншік институты (Qazpatent) және «Ғылым қоры» АҚ қолдауымен өтті.
Семинар 2024 жылдың 19 сәуірінен бастап университетте жұмыс жасап келе жатқан «Технологиялар мен инновацияларды қолдау орталығы» аясында ұйымдастырылды. Аталған орталық Дүниежүзілік зияткерлік меншік ұйымының (ДЗМҰ) бастамасымен және Qazpatent-пен бірлесіп жүзеге асырылуда. Оның негізгі мақсаты – зияткерлік меншік саласында ақпараттық-кеңес беру, патенттік ізденістерге қолдау көрсету және өңірдегі инновациялық экожүйені дамыту арқылы технологиялық ілгерілеуді ынталандыру.

Жиынға «Ұлттық зияткерлік меншік институты» РМК директорының орынбасары Айдын Артықова қатысып, кіріспе сөз сөйледі. Іс-шараның ұйымдастыру жұмыстарын Патенттік зерттеулер және Технологиялар мен инновацияларды қолдау орталығының үйлестіру бөлімінің басшысы Ұлдана Шалабаева жүргізді.
Семинар барысында Олжас Жұбанов ғылыми әзірлемелерді халықаралық патенттеу мәселелеріне тоқталып, патент алу тәртібі, талаптары және рәсімдеу ерекшеліктеріне тоқталды. Ал «Ғылым қоры» АҚ Инвестициялар және жаңа жобалар департаментінің директоры Айжан Жексембаева ғылыми жобаларды коммерцияландыру және гранттық қаржыландыру тетіктері туралы жан-жақты ақпарат берді.

Іс-шараға университет ғалымдары, қызметкерлері мен білім алушылары белсенді қатысып, өздерін қызықтырған сұрақтарға жауап алды.  
Айта кету керек, бүгінгі таңда Қорқыт ата атындағы Қызылорда университеті ғалымдарының 18 патенті, 4 өнертабысы және 100-ден астам авторлық куәліктері бар. Сонымен қатар, 3 патент «Ғылым қоры» АҚ-ның коммерцияландыру жобалары аясында жүзеге асырылуда.
Аталған семинар ғылым мен өндіріс арасындағы байланысты нығайтуға, ғылыми әзірлемелерді халықаралық деңгейде ілгерілетуге және оларды тиімді коммерцияландыруға бағытталған маңызды алаң болды.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru