• 21 наурыз 2026
• 16

Жыраулар ауылында жыр тиегі ағытылды

Ұлыстың ұлы күні – Наурыз мейрамы Сыр өңірінде ерекше сән-салтанатымен тойланды. Сырдарияның сол жағалауында орналасқан «Қайсар Арена» стадионы маңында ұйымдастырылған ауқымды мерекелік іс-шара халықтың көңілін көтеріп, ұлттық құндылықтарды ұлықтауға арналды.

Мереке аясында 40-қа жуық киіз үй тігіліп, олардың әрқайсысында қазақ халқының салт-дәстүрі мен тұрмыс-тіршілігі кеңінен насихатталды. Келушілер ұлттық ойындарға қатысып, тақырыптық көрмелерді тамашалап, концерттік бағдарламалар мен театрландырылған қойылымдарға риясыз көңілмен қол соқты. 
Думанды шараға белсене қатысқан Қорқыт ата атындағы Қызылорда университетінің ұжымы алаңға «Жыраулар ауылын» қоныстандырды. Ақшаңқан үйлерде жыршы-термешілердің терең мағыналы жырлары орындалып, көрермендерге рухани тағылым сыйлады.

Сыр сандықта сақтаулы жақұт жырларды ұйып тыңдаған облыс әкімі Нұрлыбек Нәлібаев бастаған меймандар қазақы салттың бірі – беташар рәсімін де тамашалады.  
Мерекелік шара аясында Жаратылыстану институтының өнерпаздары арнайы концерттік бағдарлама ұсынып, халық әндерінен шашу шашты. Құлақ құрышын қандырып, көңіл серпілтер әуендерге меймандармен қатар роботтар да биледі.  

Айта кету керек, биыл университетте Наурыз мейрамы аясындағы «Наурызнама» онкүндігі ерекше мазмұнда ұйымдастырылды. Шұғылалы көктемнің алғашқы күнінен бастап оқу ғимараттарында оқытушылар мен білім алушылардың қатысуымен ұлттық құндылықтарды дәріптейтін түрлі тағылымды іс-шаралар өткізілді.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru