• 19 мамыр 2026
• 132

ҚОРҚЫТ АТА УНИВЕРСИТЕТІНДЕ «FREEDOM BANK-ПЕН ҚАРЖЫЛЫҚ САУАТТЫЛЫҚ АПТАЛЫҒЫ» ӨТТІ

Қорқыт ата атындағы Қызылорда университетінде «Freedom Bank-пен қаржылық сауаттылық апталығы» аясында студенттерге арналған кездесулер өтті. Іс-шара барысында қаржылық сауаттылық негіздері мен алаяқтық схемаларынан қорғану жолдары талқыланды.

Апталықтың басты мақсаты – жастардың қаржылық сауаттылығын арттыру, қаржы өнімдерін сауатты пайдалануға үйрету және алаяқтық әрекеттерден қорғану дағдыларын қалыптастыру. Студенттер жеке бюджетті жоспарлау, ақшаны жинақтау және қаржылық қауіпсіздік қағидалары туралы білім алды.

 

Кездесулер барысында банк мамандары Асхат Қатай пен Қанат  Қалабаев студенттерге жеке қаржыны басқару, несиеге жауапты қатынас, инвестициялау негіздері, алаяқтық схемалары  (вишинг, фишинг, жалған инвестициялық ұсыныстар, әлеуметтік желілердегі алаяқтық және т.б.), дропперлік қауіпі (банк карталарын бөгде тұлғаларға беру салдары және қылмыстық жауапкершілік) бойынша ақпарат берді. 
Осындай кездесулер студенттерге өз ақшалары мен жеке деректерін қалай қорғау керектігін және қандай әрекеттер заңға қайшы келетінін түсінуге мүмкіндік береді.

Қорқыт ата атындағы Қызылорда университетінің медиа орталығы