• 26 мамыр 2026
• 185

АРДАГЕРЛЕР КЕҢЕСІНІҢ ТӨРАҒАСЫ САЙЛАНДЫ

Қорқыт ата атындағы Қызылорда университетінде Ардагерлер кеңесінің кеңейтілген мәжілісі өтті. Басқосуға университеттің ардагер ұстаздары мен зиялы қауым өкілдері қатысып, ұйымның атқарған жұмыстары мен алдағы міндеттері талқыланды.
Жиынды Басқарма төрағасы – Ректор Наурызбай Байқадамов ашып, ардагерлер ұйымының университет өміріндегі маңызына тоқталды. Ректор ардагерлердің оқу орнының дамуына қосқан үлесі мен кейінгі буынға көрсетіп келе жатқан өнегелі жолын атап өтті. Сонымен қатар, ардагерлер ұйымының алғашқы кезеңде кәсіподақ ұйымымен бірлесе жұмыс атқарғанын атап өтті.

Кездесу барысында Ардагерлер ұйымының төрағасы, техника ғылымдарының докторы, профессор Бақыт Қалиев оқу жылы көлемінде атқарылған жұмыстар туралы есеп берді. Ол ұйымның ардагерлердің әлеуметтік жағдайын жақсарту, қоғамдық белсенділігін арттыру және мәдени-рухани шараларға қатысу бағытында жүйелі жұмыс жүргізіп келе жатқанын жеткізді.

Сонымен қатар, профессор Бақыт Қалиев алдағы уақытта ғылыми жұмыстарға көбірек көңіл бөлу мақсатында өз еркімен қызметінен босайтынын мәлімдеді. Университет ректоры ұйым жұмысына қосқан үлесі үшін алғыс айтып, университет ұжымы атынан арнайы Алғыс хат табыстады.
Кеңес барысында ардагерлер өз ұсыныс-пікірлерін ортаға салып, ұйым жұмысының алдағы бағытын талқылады. Жиын қорытындысында Ардагерлер кеңесінің жаңа төрағасы қызметіне университеттің бас редакторы, «Ерен еңбегі үшін» медалінің және «Тұран» сыйлығының иегері Қали Омаров тағайындалды.

Бүгінде университеттің Ардагерлер ұйымы ауқымды жұмыстар атқарып келеді. Мемлекеттік және кәсіби мерекелер қарсаңында ардагерлерге құрмет көрсетіліп, сый-сияпаттар табысталады. Сондай-ақ жыл бойы шипажайларға жолдамалар беріледі. Ардагерлер облыстық бұқаралық ақпарат құралдары мен телеарналарда жиі көрініп, мәдени-рухани іс-шараларға, ғылыми конференциялар мен қоғамдық жиындарға белсенді қатысып келеді.
Сонымен қатар, жыл сайын ардагерлер арасында шахмат, дойбы, бильярд және өзге де спорт түрлерінен жарыстар ұйымдастырылады. Университеттің бас оқу ғимараты мен №2 оқу ғимаратында «Ардагерлер ардағым» атты арнайы стендтер орналастырылған. Университеттің 80 және 85 жылдық мерейтойларына орай өмірден озған ардагерлерге арналған «Қалдырған ізің мәңгілік» жинақтары жарық көрді.

Сондай-ақ университеттің қалыптасуы мен дамуына ерекше үлес қосқан тұлғалардың өмір жолын насихаттайтын «Ғибратты ғұмыр» сериясы бойынша Ж.Сәдуақасұлы, Бағдат Кәрібозұлы, У.Бишімбаев, Серікбай Қошқаров, А.Нұрғызарынов, Б.Сайлыбаев туралы арнайы шығарылымдар жарыққа шыққан.
Айта кетейік, университеттің Ардагерлер ұйымын 2024 жылғы 1 шілдеден бері профессор Бақыт Қалиев басқарып келді. Қазіргі таңда ұйым құрамында 369 мүше бар. Оның 261-і әйелдер, 108-і ер азаматтар. 70 жастан асқан ардагерлер саны – 201. Ал ұйым мүшелерінің 33 пайызы бүгінде университетте еңбек етуде.

Қорқыт ата атындағы Қызылорда университетінің медиа орталығы