• 10 маусым 2026
• 143

ШЫМКЕНТТЕ ҚОРҚЫТ АТА УНИВЕРСИТЕТІНІҢ КЕҢСЕСІ АШЫЛДЫ

Қорқыт ата атындағы Қызылорда университетінің алғаш рет өңіраралық кеңсесі жұмысын бастады. Негізгі бағыт – Шымкент қаласы және Түркістан облысымен шекаралас өңірлердегі білім беру кеңістігімен өзара байланысты нығайту. Сонымен қатар, талапкерлерге кәсіби бағдар беру, бизнес қауымдастықпен әріптестік орнату және университеттің білім беру мүмкіндіктерін кеңінен таныстыру жұмыстарын жүргізеді

Университет өкілі Жандос Оразмаханов кеңсенің жұмысы үш бағытта жүргізілетінін айтты. Біріншісі – талапкерлерді тарту және кәсіби бағдар беру: Шымкент, Түркістан облысы, Өзбекстан және Қырғызстан елдерінің талапкерлеріне оқу бағдарламалары мен қабылдау шарттары бойынша кеңес беріледі. Екіншісі – кәсіпкерлер мен мамандарға арналған біліктілікті арттыру және қысқа мерзімді оқыту бағдарламаларын ұйымдастыру. Үшіншісі – бизнес қауымдастықпен серіктестікті нығайту мақсатында кездесулер, семинарлар, тренингтер мен форумдар өткізу.

Айта кетейік, маусым-шілде айларында, кеңсе қызметі негізінен кәсіби бағдар беру, талапкерлерді оқуға шақыру және қабылдау науқанына қолдау көрсетуге бағытталады. Сонымен қатар, университеттің SeoulTech университетімен бірлесіп құрған Жасанды интеллект институтына дарынды талапкерлерді тарту және IT мен жасанды интеллект саласындағы білім беру мүмкіндіктерін насихаттау жұмыстары жүргізіледі.

Қорқыт ата атындағы Қызылорда университетінің медиа орталығы