Мәделхан Нәлібаев атындағы су шаруашылығы музейі

2022 жылы Қазақстан Республикасының еңбек сіңірген гидротехнигі Мәделхан Нәлібаев атындағы су шаруашылығы музейі ашылды. 

Сыр мұрабтары мен диқандарының, су және суармалы жерлерді тиімді пайдаланудың озық тәжірибелерін тарихи деректермен сабақтастырып, алдағы атқарылатын үлкен істерге бағдар болатын музейдің  жабдықталуына Қазақстанның Еңбек Ері Абзал Ералиев мол қаржы бөліп демеушілік жасады.

Музейде Сыр еліндегі ежелгі суландыру жүйелерінің пайда болу кезеңінен бастап, бүгінге дейінгі даму тарихы баяндалып, олардың зерттеулері мен карталары, су шаруашылығы саласының өсіп өркендеуі суреттелген.
Өмір жолын су шаруалығына арнап осы саланың дамуына ерекше еңбек сіңірген және бүгінгі музейдің негізін қалаған су шаруашылығы мамандарын даярлауға ерекше ұлес қосқан асыл ағамыздың бірі   – Мәделхан Нәлібаев.

Мәделхан Нәлібаев Қызылорда облысы, Сырдария ауданы, Айдарлы ауылында қасиетті Қара құм топырағында 1931 жылы 15 тамызда дүниеге келген. Сырдария ауданының Құрметті азаматы, Еуразия Халықаралық экономикалық академиясының «Құрметті академигі», Елбасы Жарлығымен «Ерен еңбегі үшін» медаль иегері, Қазақстан Республикасына еңбегі сіңірген гидротехник.

Осыдан жиырма жылдай уақыт бұрын Мәделхан Нәлібаев Сыр мұрабтары мен диқандарының еңбегін, су шаруашылығындағы озық тәжірибелерді топтастырып, тарихи музейді ашу жұмыстарын ұйымдастырды. Бұл музей біздің студенттерімізді сапалы даярлауға әсерін тигізуімен қатар облыс тұрғындарымен қонақтарын да су шаруашылығы саласындағы  тарихи жәдігерлерімен танысуға және ұрпақтар бірлігімен жалғасады.