• 09 сәуір 2026
• 52

“Girls in AI” атты халықаралық форматтағы хакатон

Ғылым айына орай Жасанды интеллект институтында “Girls in AI” атты халықаралық форматтағы Хакатон шарасы ұйымдастырылды. Іс-шараның басты мақсаты – жасанды интеллект саласында қыздардың белсенділігін арттыру, олардың практикалық дағдыларын дамыту және көптілді, халықаралық ортада жұмыс істеу қабілеттерін қалыптастыру.

Қос кезеңдік идеялар сайысының алғашқы бөлімінде студент қыздар өз жобаларын ұсынып, жасанды интеллект негізінде әзірленген шешімдерін таныстырды. Жобалар білім беру, психологиялық денсаулық, қауіпсіздік және цифрлық сервистер бағыттарын қамтыды. Қатысушылар жобаларын қазақ, орыс және ағылшын тілдерінде қорғап, халықаралық аудитория алдында өз идеяларын жеткізу мүмкіндігіне ие болды.

Екінші бөлімде SDG (Тұрақты даму мақсаттары) негізінде ұйымдастырылған мини-хакатон өтті. Қатысушылар «AI for Sustainable Future» тақырыбы аясында білім беру, менталдық денсаулық, смарт-кампус және гендерлік теңдік бағыттары бойынша өз шешімдерін әзірледі. Қысқа уақыт ішінде командалар идеядан бастап MVP (прототип) деңгейіне дейін жетіп, өз жобаларын pitch форматында қорғады.

Хакатонның ерекшелігі – командалардың аралас форматта құрылуы болды: 1-курс студенттері негізгі қатысушы ретінде, ал 2- курс студенттері ментор ретінде қатысты. Сонымен қатар, Түркиядан келіп Қорқыт Ата университетінде білім алып жатқан шетелдік студенттер де хакатонға белсенді араласып, командалар құрамында халықаралық тәжірибе алмасуға мүмкіндік жасады.

Іс-шара барысында қатысушылар ChatGPT, Gemini, Figma және басқа да заманауи AI құралдарын пайдаланып, қысқа уақыт ішінде өз идеяларын нақты өнімге айналдыру тәжірибесін көрсетті.

“Girls in AI” іс-шарасы Ғылым айы аясында ұйымдастырылған маңызды бастамалардың бірі ретінде студенттердің креативті ойлауын, командалық жұмысын және технологиялық дағдыларын дамытуға ықпал етті.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru