• 02 қазан 2026
• 33

ҚОРҚЫТ АТА УНИВЕРСИТЕТІНІҢ ҚОС ҚҰРАМАСЫ АСТАНАДА ӨТЕТІН QAZAQSTAN STUDENT LEAGUE ФИНАЛЫНА ЖОЛДАМА АЛДЫ

Қорқыт ата атындағы Қызылорда университетінің ерлер және әйелдер футбол құрамалары Qazaqstan Student League студенттер лигасының іріктеу кезеңінде жеңімпаз атанып, жарыстың финалдық кезеңіне жолдама алды.

Футболдан студенттер арасындағы жарыс Қазақстан Республикасының Туризм және спорт министрлігінің Спорт және дене шынықтыру істері комитеті, Қазақстан футбол федерациясы және Қазақстан Республикасы Ғылым және жоғары білім министрлігінің Жоғары және жоғары оқу орнынан кейінгі білім комитетінің қолдауымен, сондай-ақ Қазақстан Республикасы Оқу-ағарту министрлігінің «Ұлттық ғылыми-практикалық дене тәрбиесі орталығы» РМҚК қатысуымен ұйымдастырылды.

Қызылорда қаласында өткен іріктеу кезеңіне жоғары оқу орындары мен колледждердің студенттік футбол командалары қатысып, ерлер және әйелдер арасында өзара бақ сынады. Бір аптаға жуық уақытқа созылған тартысты дода қорытындысында Қорқыт ата университетінің әйелдер мен ерлер құрамасы 1-орын иеленіп, диплом және алтын медальмен марапатталды.

Сонымен қатар жарыстың үздік ойыншылары да арнайы марапаттарға ие болды. Университеттің ерлер құрамасынан Жұбанов Абылай «Үздік қорғаушы», ал Сүйіндік Мұхаммед «Үздік ойыншы» атанды. Әйелдер құрамасының ойыншылары арасынан Шыныбекова Ақбота «Үздік қақпашы» атанса,  Сабыр Ақнұр «Үздік ойыншы» номинациясына лайық деп танылды.

Қорқыт ата атындағы Қызылорда университетінің медиа орталығы