• 13 қазан 2025
• 40

Шетелде оқу – қорқыныш емес, мүмкіндік

Қорқыт ата атындағы Қызылорда университетінің 2-курс студенті Абылайхан Жандосұлы академиялық ұтқырлық бағдарламасы аясында қазіргі таңда Бельгияда білім алып жүр. Ол бұл сапардың өзіне берген әсерімен және шетелдегі оқу тәжірибесімен бөлісті.
«Алғаш Бельгияға келген сәтімде бәрі жаңа, ерекше көрінді. Әуежайдан бастап айналам таза, тыныш, адамдар сабырлы болды. Бір сәтке өзімді басқа әлемде жүргендей сезіндім. Адамдардың сөйлеуі, өмір сүру салты мүлде бөлек екенін бірден байқадым», — дейді Абылайхан алғашқы әсерімен бөлісіп.
Абылайхан бұл мүмкіндік жайлы университет қабырғасында жүргенде білген. Оқытушылар мен халықаралық бөлім қызметкерлері шетелде оқу бағдарламалары туралы айтып, студенттерді белсенді қатысуға шақырған.

«1-курс соңында институт деканы өзімнің академиялық ұтқырлыққа үміткер екенімді айтып, құжат жинау процесін бастадық», — дейді ол.
Академиялық алмасу бағдарламасы арқылы Бельгияға аттанған студент виза мен құжат рәсімдеу кезінде біраз қиындық болғанын жасырмады.
«Барлық құжаттарды ағылшын және нидерланд тілінде толтыру керек болды. Қателіктер мен артық шығындар да кездесті, бірақ Брюссельге қонған сәтте оның бәрі ұмытылып кетті», - деді студент.
Бельгия университеті шетелдік студенттерге барынша қолдау көрсеткен. Адаптация аптасы өтіп, менторлар мен кеңесшілер көмек беріп отырған. Сабақтар ағылшын тілінде өтеді, ал студенттер арасындағы атмосфера өте жылы.
«Бәлкім, барлығымыз әр елден келгендіктен болар, ортада ерекше достық қарым-қатынас қалыптасқан», — дейді Абылайхан.
Оның айтуынша, ерекше ұнаған пәндер — Basic Programming пен Computer Network.
«Бұл пәндерде нақты жобалармен жұмыс істейміз. Профессорлар білікті, әр студенттің идеясын қолдап, қателіктерін түсіндіруге дайын», — дейді студент.
Бельгиядағы оқу тәжірибесі оның өмірлік көзқарасын да өзгертті.
«Бұрын тек оқу мен стипендия алуды мақсат етсем, қазір өз жобамды жасап, қоғамға пайда әкелуді армандаймын. Мұнда студенттерге жасалған жағдай керемет, сол себепті өз ісіңе толық көңіл бөле аласың», — дейді.
Бос уақытында Абылайхан достарымен қаланы аралап, мәдени іс-шараларға қатысады, спортпен айналысады.
«Қала шағын болғанымен өте әсем. Таңғы және кешкі уақытта таза ауада жүгіруге тамаша мүмкіндік бар», - деді.
Бельгиялық студенттер қазақстандықтарды еңбекқор, ашық мінезді деп таниды екен.
«Көпшілігі Қазақстан туралы аз біледі, бірақ қызығушылық танытады. Бұл жақтың студенттері өзгелерге баға бермей, әр адаммен жеке танысқанда ғана пікір білдіреді. Бұл — бәрімізге үлгі боларлық қасиет», — деп бөлісті Абылайхан.

Бельгияда өмір сүру салыстырмалы түрде қымбат болғанымен, студенттерге арналған жеңілдіктер көп.
«Көлік, жатақхана және азық-түлік бағалары студенттерге ыңғайлы. Арзан супермаркеттер көп, сондықтан күнделікті тұрмысқа алаңдамайсың», — дейді ол.
Абылайханның айтуынша, бұл сапар оның өмірін түбегейлі өзгерткен.
«Бұл тәжірибе мені өзіме сенімді, ашық әрі жауапты етті. Шетелде оқу — үлкен мектеп», — дейді студент.
Шетелде оқуға ниетті жастарға ол қысқаша кеңес береді:
«Қорықпа! Құжат жинаудан баста, тіл үйрен, және өз мақсатыңа сен. Жас кезде көріп, үйреніп қалу — үлкен байлық. Қорқыныш емес, мүмкіндікті жіберіп алу — ең жаман нәрсе».
Қорқыт ата атындағы Қызылорда университетінің студенті Абылайхан Жандосұлының Бельгиядағы тәжірибесі - өзге студенттерге үлгі боларлық тәжірибе.

Корқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_2022@korkyt.kz