• 14 қазан 2025
• 45

Психикалық денсаулық – әр адамның өз қолында

Қорқыт ата атындағы Қызылорда университетінде 10 қазан – Дүниежүзілік психикалық денсаулық күніне орай студенттерге арналған танымдық лекция өтті. 
Іс-шараның мақсаты – жастар арасында психикалық денсаулықтың маңыздылығын түсіндіру және өз-өзіне қамқор болу мәдениетін қалыптастыру болды. 
Кездесуге Қызылорда облыстық жастар денсаулық орталығының мамандары Мақпал Бексұлтанова мен Айгерім Альменова қатысып, студенттерге дәріс оқыды.

Олар өз баяндамаларында зорлық-зомбылықтың психологиялық әсері, лудоманияның (ойынқұмарлықтың) алдын алу жолдары, сондай-ақ адамның психикалық саулығын сақтау тәсілдері жөнінде жан-жақты ақпарат берді. 
Мамандар жастарға күйзеліс, мазасыздық, өзіне сенімсіздік сияқты жағдайлармен күресу жолдарын, эмоциялық тұрақтылық пен позитивті ойлаудың психикалық денсаулыққа әсерін түсіндірді.
Сондай-ақ, кездесу барысында студенттер мамандарға өздерін толғандырған сұрақтарын қойып, ашық пікір алмасуға мүмкіндік алды. 

Шара соңында қатысушылар психикалық саулықтың адамның жалпы өмір сапасына тікелей әсер ететінін және оны сақтау – әрбір адамның өз қолында екенін атап өтті.
Айта кетейік, университетте Психологиялық қолдау орталығы екі жылдан астам уақыт бойы студенттердің рухани және эмоционалды саулығын нығайту бағытында жұмыс істеп келеді.

Корқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_2022@korkyt.kz