• 20 мамыр 2026
• 138

ОҚЫТУШЫЛАР COURSERA ПЛАТФОРМАСЫНА ЖАППАЙ АШЫҚ ОНЛАЙН КУРС ӘЗІРЛЕУ ДАҒДЫЛАРЫН МЕҢГЕРДІ

Қорқыт ата атындағы Қызылорда университетінің Біліктілікті арттыру және қосымша білім беру Орталығының ұйымдастыруымен профессор-оқытушылар құрамының біліктілігін арттыру мақсатында «Coursera платформасында Жаппай ашық онлайн курстарын әзірлеу және түсіру талаптары» тақырыбында семинар өтті. Семинар Zoom платформасы арқылы өтіп, оған университеттің 330 профессор-оқытушысы қатысты.

Вебинардың негізгі мақсаты профессор-оқытушылар құрамына Жаппай ашық онлайн курстарды әзірлеудің кезеңдерін, педагогикалық және техникалық талаптарын түсіндіру, сондай-ақ университеттің цифрлық білім беру жүйесіне сапалы онлайн курстар енгізу дағдыларын қалыптастыру, онлайн курс әзірлеудің ерекшелігі және Coursera платформасының мүмкіндіктері болды.

Семинар барысында қатысушыларға ЖАОК форматының ерекшеліктері, онлайн курс құрылымын жоспарлау, контент дайындау алгоритмдері,бейне-дәрістер мен тест тапсырмаларын әзірлеу жолдары, LMS платформасына жүктеу кезеңдері және курстың сапасын бағалау критерийлері туралы жан-жақты ақпарат берілді. Сонымен қатар, Coursera платформасының құрылымы, халықаралық аудиторияға арналған цифрлық контент әзірлеу талаптары және интерактивті оқыту элементтерін қолдану мәселелері кеңінен қарастырылды.

Семинарда ЖАОК пен дәстүрлі оқытудың айырмашылығы, ЖАОК әзірлеудің негізгі кезеңдері, курс құрылымы және оқу нәтижелері, бейнеконтент дайындау және түсіру талаптары, Course Builder мүмкіндіктері, курс түсіруде жиі кездесетін қателіктер және ұсыныстар,бейне түсірудің техникалық талаптары қарастырылды. Атап айтқанда, камера мен дыбыс сапасы, жарық қою, кадр композициясы, спикердің сөйлеу техникасы, Full HD форматында монтаж жасау, субтитр дайындау және инфографика қолдану тәсілдері түсіндірілді.

Семинар презентациялар мен бейнематериалдар арқылы өткізіліп, соңында оқытушылар өз ұсыныстарын білдіріп, сұрақтарын қойып, тәжірибе алмасу форматында еркін пікірталас жүргізді.

 Қорқыт ата атындағы Қызылорда университетінің медиа орталығы