• 30 қазан 2026
• 26

ҚОҒАМДЫҚ КЕЛІСІМ МЕН ТОЛЕРАНТТЫЛЫҚ – БАСТЫ ҚҰНДЫЛЫҚ

Қорқыт ата атындағы Қызылорда университетінде "Korkyt Ethno" орталығының ұйымдастыруымен Қазақстан халқы Ассамблеясының «Шаңырақ» кафедралары қауымдастығы» республикалық қоғамдық бірлестігінің сарапшыларымен кездесу өтті.
Сарапшылық кездесу Қазақстан Республикасы Мәдениет және ақпарат министрлігінің тапсырысы бойынша «Оңтүстік өңірлерде тілге қатысты және этностық белгілері бойынша ар-намысқа тию мен қорлаудың кез келген түріне жол бермеу» тақырыбындағы әлеуметтік жоба аясында ұйымдастырылды.

Кездесуге университеттің профессор-оқытушылар құрамы мен жастар құрылымдарының жетекшілері қатысты. Іс-шара барысында ақпараттық кеңістікте өшпенділік тілінің таралуына жол бермеу, тілдік және этностық белгілері бойынша араздық пен алауыздықтың алдын алу мәселелері талқыланды.
Сонымен қатар, жастардың медиасауаттылығы мен сыни ойлау қабілетін дамыту, білім беру ортасында өзара құрмет, толеранттылық және қоғамдық келісім құндылықтарын нығайту бағыттарына ерекше назар аударылды.

Қатысушылар араздық тілінің алдын алуда жаңа ақпараттық технологияларды тиімді пайдалану жөнінде пікір алмасып, профилактикалық жұмыстарға профессор-оқытушылар мен жастар ұйымдарын белсенді тартудың маңыздылығын атап өтті.
Сарапшылық кездесу білім беру ұйымдары мен қоғамдық институттар арасындағы ынтымақтастықты нығайтуға және жастар арасында жауапты ақпараттық мәдениетті қалыптастыруға бағытталды.

Қорқыт ата атындағы Қызылорда университетінің медиа орталығы