• 01 маусым 2024
• 175

«Тарих. Тағдыр. Тағылым» атты ғылыми-танымдық конференция өтті

Бүгін Қазалы ауданындағы Р.Бағланова атындағы мәдениет орталығында 31 мамыр – саяси қуғын-сүргін құрбандарын еске алу күніне орай Қорқыт Ата университеті мен аудан әкімдігі бірлесе ұйымдастырылған «Тарих. Тағдыр. Тағылым» атты тарихи-танымдық конференция өтті. 

Конференцияға Қорқыт ата атындағы Қызылорда университетінің оқытушы ғалымдары, саяси қуғын-сүргін құрбандарын толық ақтау жөніндегі аудандық жұмысшы топ мүшелері, тарихшы ұстаздар мен жастар қатысты. 

Қорқыт ата атындағы Қызылорда университетінің аға оқытушысы, педагогика ғылымдарының магистрі, Тарих және қоғамдық ғылымдар академиясының академигі Ахметбек Бақытжан Мұқарамұлы «ХХ ғасырдың 30-жылдарындағы Сыр бойында болған көтерілістер ақиқаты» тақырыбында, ал «Тарих және археология» білім бағдарламасының аға оқытушысы, тарих магистрі Жұмаділдаев Мәулен Мұратбекұлы «Қазақ байларын тәркілеу шаралары (Қызылорда өлкесі мысалында)» тақырыптарында баяндама жасады.

Жиын соңында тарихи өтпелі кезеңде ел-халықтың азаттығы жолында жазықсыз жапа шеккен, ашаршылық пен саяси қуғын-сүргіннің құрбаны болған ата-бабаларымызды жадымыздан шығармау перзенттік парызымыз, азаматтық борышымыз екенін айтылып, қорытындыланды.