• 12 қараша 2024
• 340

Мөлдір Алпамыс: Шетелдегі академиялық тәжірибе

Қорқыт ата атындағы Қызылорда  университетінің студенті Мөлдір Алпамыс академиялық ұтқырлық бағдарламасымен Польшада білім алуда. Шетелге оқуға бару туралы шешімді Қарағандыда Евней Букетов атындағы университетте бір семестрлік оқу кезінде қабылдаған. Қарағандыдағы тәжірибе оған жаңа ортада оқудың қаншалықты пайдалы екенін көрсетіп, шекара асып, халықаралық деңгейде білімін жетілдіруге ынталандырды.

Мөлдірдің айтуынша, Польша білім беру жүйесінің ерекшеліктері оны бірден қызықтырған. Сабақтар теория, практика және лабораториялық жұмыстарды қамтиды. Бұл үш бағыттың үйлесімділігі білімді тереңдетіп, оны іс жүзінде қолдануға көмектеседі. “Мұнда студенттердің өз бетінше жұмыс істеуіне көп мән беріледі, бұл менің дербес зерттеу дағдыларымды дамытуға үлкен ықпал етті,” – дейді.

Польшадағы студенттік өмір Мөлдір үшін тек оқумен шектелмейді. Ол жергілікті мәдениетпен етене танысып, қаланы аралап, түрлі мәдениет өкілдерімен достық қарым-қатынас орнатудан ерекше әсер алып жүр. “Жаңа елдің тұрмыс-салты мен тілін үйрену – мен үшін үлкен тәжірибе. Бұл жақтағы достарыммен әртүрлі мәдени іс-шараларға қатысу өмірімнің маңызды бөлігіне айналды.”

Сонымен қатар, Мөлдір Польшадағы білім беру жүйесінен көптеген жаңа дағдыларды меңгергенін айтады. Практикалық сабақтарда заманауи зертханалық жабдықтармен жұмыс істеу және басқа елдердің студенттерімен бірлесе жобалар орындау оның кәсіби біліктілігін арттырды. “Әр жоба студенттердің ұжымдық рухын дамытып, мәдениет алмасудың құнды сәттеріне айналады. Болашақ әріптестерімнің көмегімен жаңа нәрселер үйрену әрі қызықты, әрі есте қаларлық болды,” – деп бөлісті Мөлдір.

Осылайша, Польшадағы уақыты Мөлдірге тек білім алуға емес, сонымен қатар жаңа достар табуға, мәдени айырмашылықтарды түсінуге және болашағына жаңа көзқараспен қарауға мүмкіндік берді. “Алдағы уақытта алған білімімді әрі қарай дамытып, өз саламда білікті маман болуды мақсат етіп отырмын,” – деп өз ойын түйіндеді.

 
Қорқыт ата атындағы Қызылорда университетінің медиа орталығы