• 20 қараша 2024
• 138

SeoulTech: қос диплом бағдарламасын жүзеге асыру талқыланды

Қорқыт ата атындағы Қызылорда университетіне Сеул ұлттық ғылым және технология университетінің (SeoulTech) делегациясы ресми сапармен келді. Бұл сапар “қос диплом” бағдарламанын жүзеге асыру, ғылыми жобалар мен академиялық алмасу мәселелерін талқылауға арналды. Қос дипломды бағдарлама университет студенттеріне жаһандық деңгейде білім алуға, заманауи технологиялар мен ғылыми зерттеулерге қол жеткізуге жол ашады.

Делегация құрамында провост, халықаралық істер басқармасының жетекшісі Джихон Хванг, электротехника және ақпараттық инжиниринг кафедрасының профессоры Джунгсу Ким, сондай-ақ халықаралық бағдарламалар менеджері Суньён Хванг болды.

Сапар барысында қонақтар университеттің №5 оқу ғимаратын аралап, білім беру инфрақұрылымымен танысты. Олар заманауи зертханалар мен аудиторияларды жоғары бағалап, студенттерге жасалған жағдайларды ерекше атап өтті.  

Профессор Джунгсу Ким университет студенттерімен кездесу өткізіп, электротехника мен ақпараттық технологиялар саласындағы заманауи трендтер туралы дәріс оқыды. Ол студенттердің сұрақтарына жауап беріп, саладағы жаңа бағыттар мен мүмкіндіктер туралы өз тәжірибесімен бөлісті.

Сеул ұлттық ғылым және технология университеті мен Қорқыт ата атындағы Қызылорда университетінің әріптестігі аясында бірлескен жобаларды жүзеге асыру, ғылыми зерттеулер мен академиялық алмасуларды кеңейту мүмкіндігі қарастырылуда. Осындай халықаралық байланыстар студенттерге жаңа мүмкіндіктер ашып, олардың жаһандық білім беру кеңістігіне интеграциялануына ықпал етеді.