• 27 қараша 2024
• 246

Сымбат Сырлыбайқызы: "Қазақстан мен Кореяның ұқсас тұстары көп"

Қорқыт ата атындағы Қызылорда университетінің студенті Сымбат Сырлыбайқызы қазір Оңтүстік Кореяның Каннам университетінде білім алуда. 

Сымбаттың айтуынша, Кореяға кетер алдында ол корей тілін қарқынды түрде меңгеріп, TOPIK емтиханына дайындалған. “Университеттің веб-сайтындағы хабарландыруды көргеннен кейін қажетті құжаттарды жинадым. Халықаралық қатынастар бөліміндегі Тимур Ибраевичтен кеңес алдым. Бұған дейін осы бағдарлама аясында білім алған Іңкәр Халиқызы бізге көп көмектесті. Ол тәжірибесімен бөлісіп, бағдарламаға дайындалуға бағыт берді,” – деді Сымбат.

Жаңа елге келгенде тіл мен мәдени айырмашылықтарға байланысты біраз қиындықтарға тап болғанын да жасырмады. “Алғашқы кездері жаңа ортада өзімді жалғыз сезіндім. Бірақ уақыт өте келе бейімделіп, керісінше, өзімді бақытты сезіндім. Корей халқының қонақжайлығы мен мейірімділігі маған көп көмектесті”.

Сымбаттың айтуынша, Кореядағы университеттер студенттер үшін барлық жағдайды жасайды. “Сабақтардан бөлек, түрлі клубтарға қатысуға мүмкіндік бар. Мен ‘Body Mentorship’ клубына мүше болдым, бұл жерде жаңа достар таптым. Сабақтан бос уақытта кітапханада кітап оқимын немесе қаланы аралаймын. Корей студенттерінің еңбекқорлығына тәнтімін: олар күні бойы сабақ оқып, кітапханаларда түнге дейін дайындалады,” – дейді Сымбат.

Сымбаттың сөзінше, университеттегі дәрістер ерекше әсер қалдырады. “Әсіресе, Чоң Ге Хёң профессордың ‘Дәстүрлі Корей мәдениеті мен контенті’ пәнінен берген дәрістері өте қызықты. Сабақ барысында Қазақстан мен Кореяның мәдениетін салыстырып, ұқсастықтарды анықтаймыз”.

Сымбат Қазақстанға оралған соң, шет тілдері саласын дамытуға үлес қосқысы келеді. “Мен алған білімімді жастармен бөлісіп, болашақ мамандарға жол көрсеткім келеді. Сондай-ақ, Сеултехтің филиалында кәсіби аудармашы ретінде қызмет етуге ниеттімін,” – дейді.

Сымбат Кореялық достарына Қазақстанның бай мәдениеті, табиғаты және қонақжай халқы туралы жиі айтып отыратынын жеткізді. “Қазақ халқының мейірімділігі мен ұлттық тағамдары туралы айтқанымда, олар Қазақстанға саяхаттағысы келетіндерін айтты. Студенттермен қатар, профессорлар да біздің мәдениетке ерекше қызығушылық білдіреді,” – деді Сымбат.