• 06 ақпан 2026
• 85

Қорқыт ата университетінде «Прокурорлық қадағалау» дәрісханасы мен коворкинг орталығы ашылды

Қорқыт ата атындағы Қызылорда университетінде «Заң мен тәртіп» қағидатын іске асыру аясында Қызылорда облыстық прокуратурасымен бірлескен «Прокурорлық қадағалау» дәрісханасы мен коворкинг орталығының салтанатты ашылу рәсімі өтті.
Шараға университет Ректорының міндетін атқарушы Дана Абдрашева, Қызылорда облысының прокуроры Ризабек Ожаров, Бас прокуратураның  кадрлық қамтамасыз ету басқармасының бастығы Қанат Жұбатыров, «Amanat» партиясы Қызылорда облыстық филиалының төрағасы Жандос Базартай, прокуратура өкілдері, профессор-оқытушылар құрамы, студенттер мен БАҚ өкілдері қатысты.

Салтанатты жиында жаңа дәрісхананың лентасын Дана Абдрашева, Ризабек Ожаров және Қанат Жұбатыров қиды.
Алғашқы сөз сөйлеген Қызылорда облысының прокуроры Ризабек Ожаров аталған бастаманың құқықтық мәдениетті арттырудағы және студенттердің кәсіби даярлығын нығайтудағы маңыздылығын атап өтті. Сондай-ақ, Бас прокуратураның  кадрлық қамтамасыз ету басқармасының бастығы Қанат Жұбатыров университеттің 10 мыңнан астам түлегі бүгінде құқық саласында еңбек етіп жүргенін айтып, білім ордасының кітапхана қорына бірнеше кітап сыйлады.

Жиын барысында «Прокурорлық қадағалау» дәрісханасында сабақ беру кестесіне қол қою рәсімі өтті. Бұл – университет пен облыстық прокуратура арасындағы меморандум аясындағы өзара әріптестіктің нақты нәтижесі болып табылады. Қазіргі таңда «Құқықтану» білім беру бағдарламасында 500-ге жуық азаматтық, әкімшілік және қылмыстық құқықтық бағыттары бойынша бакалавр мамандары даярлануда. Сонымен қатар, арнайы «Студенттік заң клиникасы» мен «Жас заңгерлер» ғылыми-шығармашылық үйірмесінде білім алушыларымыз жан-жақты өздерін дамытуда. Құзырлы орган тарапынан білікті мамандар келіп арнайы шеберлік дәрістер жүргізеді.  Сондай-ақ студенттер өндірістік және диплом алды практикадан өтуде. Жыл сайын студенттер Қазақстан Республикасы Бас Прокуратурасының жанындағы құқық қорғау органдары академиясына оқуға түсу үшін кеңес беру жұмыстары да үнемі жүргізіледі. Осы сәтте университетіміздің бірнеше түлегі аталмыш академияның магистратура бағытында білімдерін жалғастырып жатыр. Жасөспірімдер арасындағы бұзақылық, суицид, сонымен қатар киберқылмыстылықпен күресу бағытында облыстық прокуратурамен ғылыми ізденіс жұмыстарын жүргізу үшін жасақталған жұмыс тобы нәтижелі қызмет етіп келеді.  

Сонымен қатар, іс-шара барысында дәрісхананың ашылуына үлес қосқан бірқатар азаматтар марапатталды. Қызылорда облысының прокуроры Ризабек Ожаров, Бас прокуратураның  кадрлық қамтамасыз ету басқармасының бастығы Қанат Жұбатыров, Облыс прокурорының орынбасары Мәди Сарпеков және Облыстық прокуратураның басқарма бастығы Батырбек Нұрмағанбетов университеттің ең жоғары марапаты – «Қорқыт Ата атындағы Алтын медальмен» марапатталды. Ал Қызылорда облысы бойынша құқықтық статистика және арнайы есепке алу Департаментінің бөлім бастығы Естай Жұқашев пен Байқоңыр қаласы прокурорының орынбасары Арман Жаппасбаевқа «Үздік түлек» медалі табысталды.

Шара соңында «КримЭкс-2025» криминалистика және сот сараптамасы бойынша үздік білгірлер байқауының ІІ орын иегері атанған студенттер облыс прокурорының Алғыс хаттарымен марапатталды.
Бұл бастама студенттердің құқықтық сауаттылығын арттырып қана қоймай, болашақ заңгерлердің тәжірибелік білімін жетілдіруге мүмкіндік береді.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru