• 22 мамыр 2026
• 115

ЖАСТАРДЫҢ ДАМУЫНА СЕРПІН БЕРГЕН «CREATIVE DAY»

Қорқыт ата атындағы Қызылорда университеті мен «AMANAT» партиясы облыстық филиалының ұйымдастыруымен жастардың басын қосқан «Creative Day» іс-шарасы өтті. 

Шараның басты мақсаты – жастардың азаматтық белсенділігін арттыру, құқықтық және қаржылық сауаттылығын дамыту. 

Сондай-ақ мемлекеттік бағдарламаларды кеңінен таныстырып, жұмыспен қамтуға қолдау көрсету және жастар арасында тәжірибе алмасу алаңын қалыптастыру.

Жиында партияның облыстық филиалының төрағасы Жандос Базартай жастардың қоғамдағы рөліне тоқталып, іс-шараның маңызын атап өтті.

Жиын барысында  қатысушылар баспана алу мүмкіндіктері, қаржылық сауаттылық, заң көмегі, кәсіпкерлік бастамалар, алаяқтықтың алдын алу, денсаулық сақтау және экологиялық мәдениет бағыттары бойынша сала мамандарынан нақты кеңестер алды. 

Сонымен қатар Мансап орталығымен бірлесіп ұйымдастырылған бос жұмыс орындары жәрмеңкесіне қатысып, тұрақты жұмысқа орналасу мүмкіндіктерімен танысты.

Айта кетейік, жәрмеңкеге 17 мекеме қатысып, жастар бағдарламалары аясында 295 бос жұмыс орны ұсынылды. 

Шара барысында жастар өздерін қызықтырған сауалдарға жауап алып, мемлекеттік бағдарламалар мен жастарға арналған жобалар жөнінде мәлімет алды. 

Ұйымдастырушылар мұндай мазмұнды кездесулер алдағы уақытта да тұрақты түрде өткізілетінін атап өтті.

Қорқыт ата атындағы Қызылорда университетінің медиа орталығы