• 20 шілде 2026
• 104

ҚОРҚЫТ АТА УНИВЕРСИТЕТІНІҢ ОҚЫТУШЫЛАРЫ ҚЫТАЙДАҒЫ ХАЛЫҚАРАЛЫҚ БІЛІМ БЕРУ БАҒДАРЛАМАСЫНА ҚАТЫСТЫ

«Бір белдеу – бір жол» бастамасына қатысушы елдердің Қытай мәселелерін зерттеу жөніндегі сарапшыларды даярлауға арналған халықаралық бағдарлама аясында Экономика және құқық институтының директоры Айнұр Исаева, аға оқытушы Гүлзат Өтегенова бірқатар ғылыми-білім беру іс-шараларына қатысты.
Бағдарлама Қазақстан, Қытай, Палестина, Камбоджа, Лаос, Малайзия, Таиланд, Түркия, Бенин және Нигериядан келген қатысушылардың басын қосып, тәжірибе алмасуға және халықаралық академиялық ынтымақтастықты нығайтуға мүмкіндік берді.

Университет өкілдері «Қытайдың ұлттық даму жоспарлауының эволюциясы мен әдіснамасы» тақырыбындағы семинарға қатысып, Қытайдың стратегиялық жоспарлау жүйесі, бесжылдық даму жоспарларының қалыптасуы және олардың елдің әлеуметтік-экономикалық дамуындағы рөлі туралы жан-жақты ақпарат алды.
Сондай-ақ, қатысушылар «Қытайдың кедейлікті жою тәжірибесі және одан алынған сабақтар» тақырыбындағы дәріске қатысты. Онда Қытайдың кедейлікті азайтуға бағытталған мемлекеттік саясаты, ауылдық аумақтарды дамыту, халықтың әл-ауқатын арттыру, өңірлік теңгерімді дамыту және тұрақты әлеуметтік-экономикалық өсуді қамтамасыз ету бағытындағы тәжірибесі кеңінен таныстырылды. Сонымен қатар, бұл саладағы Қытайдың жетістіктері мен халықаралық деңгейде жоғары бағаланған тәжірибесі талқыланды.

Бағдарлама аясында қатысушылар ЮНЕСКО-ның Бүкіләлемдік мұралар тізіміне енген адамзат өркениетінің ең ірі тарихи-мәдени ескерткіштерінің бірі – Ұлы Қытай қорғанына барып, тарихи нысанның бай тарихы мен мәдени құндылықтарымен танысты.

Қорқыт ата атындағы Қызылорда университетінің медиа орталығы