• 21 шілде 2026
• 92

ҚОРҚЫТ АТА УНИВЕРСИТЕТІНІҢ ОҚЫТУШЫЛАРЫ КӘСІБИ БІЛІКТІЛІГІН АРТТЫРУДА

Қорқыт ата атындағы Қызылорда университетінің «Электр энергетикасы, техносфералық қауіпсіздік және экология» білім беру бағдарламасының аға оқытушысы Светлана Жүргенбаевна Кужамбердиева мен «Инжинирингтік технологиялар» білім беру бағдарламасының аға оқытушысы Салтанат Маратовна Аппазова Қытай Халық Республикасында өтіп жатқан халықаралық семинарға қатысуда.

Семинар Қытай Халық Республикасы Коммерция министрлігінің (MOFCOM) қолдауымен жүзеге асырылып жатқан халықаралық білім беру бағдарламасы аясында ұйымдастырылған.

Іс-шараның мақсаты – қоршаған ортаны қорғау, экологиялық қауіпсіздікті қамтамасыз ету, жасыл технологияларды дамыту және тұрақты даму қағидаттарын енгізу бағытындағы озық халықаралық тәжірибені зерделеу.

Семинарға қатысушы, «Электр энергетикасы, техносфералық қауіпсіздік және экология» білім беру бағдарламасының аға оқытушысы Светлана Жүргенбаевна Кужамбердиева халықаралық тәжірибе алмасудың маңызын атап өтті.

«Бұл бағдарлама экология және тұрақты даму бағытындағы халықаралық тәжірибемен танысып қана қоймай, түрлі елдердің мамандарымен кәсіби байланыс орнатуға мүмкіндік береді. Семинар барысында алынған білім мен тәжірибені білім беру үдерісі мен ғылыми-зерттеу жұмыстарында тиімді пайдалануға ниеттіміз. Осындай халықаралық бастамалар кәсіби дамуға жаңа серпін береді», – деді Светлана Кужамбердиева.

Бағдарлама барысында қатысушылар әлемнің әртүрлі елдерінен келген сарапшылармен тәжірибе алмасып, Қытайдың экология, табиғи ресурстарды басқару және инновациялық технологиялар саласындағы озық тәжірибесімен танысуда.

Мұндай халықаралық білім беру бағдарламалары оқытушылардың кәсіби құзыреттілігін арттырып, халықаралық академиялық байланыстарды нығайтуға және университеттің ғылыми-білім беру әлеуетін дамытуға мүмкіндік береді.

Қорқыт ата атындағы Қызылорда университетінің медиа орталығы