• 05 желтоқсан 2023
• 1407

Францияның Қазақстандағы Төтенше және Өкілетті Елшісі қызылордалық білім алушылармен кездесті

Қорқыт ата атындағы Қызылорда университетіне Францияның Қазақстандағы Төтенше және Өкілетті Елшісі Дидье Канесс келді.

«Гендерлік зорлық-зомбылыққа қарсы 16 күндік белсенді іс-әрекет» акциясы шеңберінде ЖОО-да өткен қалалық университеттер арасындағы кейс-чемпионатқа қатысып, жеңімпаздарға диплом табыстады.

25 караша – Әйелдерге қатысты зорлық-зомбылықты жою үшін халықаралық күрес күні мен 10 желтоқсан – Халықаралық Адам құқықтары күніне орай Біріккен ұлттар ұйымының даму бағдарламасы жыл сайын халықаралық науқан өткізеді.

Дидье Канесс бұл шараның маңыздылығына тоқталып, адамдардың құқықтық сауаттылығын арттыру өте өзекті екенін атап өтті.

Кейс-чемпионатқа өңірдегі 3 ЖОО-ның студенттерінен құралған 8 команда қатысып, гендерлік зорлық-зомбылықтың алдын алу бойынша зерттеулерін және ұсыныстарын жеткізді.

Сондай-ақ, Францияның Қазақстандағы Төтенше және Өкілетті Елшісі Дидье Канесс Қорқыт ата атындағы Қызылорда университетінің Басқарма төрағасы – Ректордың міндетін атқарушы, Әлеуметтік және тәрбие жұмыстары жөніндегі проректор Жандос Базартай, Ғылыми жұмыстар және халықаралық байланыстар жөніндегі проректор Майнұр Бөрібаевамен кездесіп, өзара әріптестікті нығайту мәселелерін талқылады.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
e-mail: kmu.kmu@list.ru