• 12 сәуір 2024
• 121

Ғылым күніне салтанатты мәжіліс өтті

Бүгін Қорқыт ата атындағы Қызылорда университетінде 12 сәуір – Ғылым қызметкерлері күніне арналған «Әлемді ғылым құтқарады-2024» атты салтанатты жиын өтті.

Жиынға Қорқыт Ата атындағы Қызылорда университетінің профессор - оқытушылары мен білім алушылары қатысты. Алғаш болып, «Қазақ тілі мен əдебиеті жəне журналистика» білім беру бағдарламасының профессоры, филология ғылымдарының кандидаты Ғабит Тұяқбаев «Ғылыми жоба жасаудағы тəжірибе» тақырыбында баяндама жасады.

«Аграрлық технологиялар» білім беру бағдарламасының профессоры, ауылшаруашылығы ғылымдарының докторы Лаура Тохетова «Ауыл шаруашылығы дақылдар селекция ғылымының дамуы–еліміздің азық-түлік қауіпсіздігінің негізі» тақырыбын ортаға салды.

Сондай-ақ «Ғылымды дамыту - Жаңа Қазақстанның өркендеуінің басты бағыты» тақырыбында«500 ғалым» бағдарламасының жеңімпазы, «Су шаруашылығы жəне жерге орналастыру» білім беру бағдарламасының аға оқытушысы, ауыл шаруашылығы ғылымдарының кандидаты Элмира Елеуова және «Керамика Приаралья: прошлое и желаемое будущее» тақырыбында «500 ғалым» бағдарламасының жеңімпазы, «Археология жəне этнография» ғылыми орталығының ғылыми қызметкері, тарих ғылымдарының магистрі Гүлмира Амиргалина баяндама жасады. Мұнан бөлек, «Жас ғалымдарды мемлекеттік қолдаудың бүгіні мен болашағы» тақырыбында «Ректор гранты – 2021» конкурсының грант иегері, «Физика-химиялық талдау əдістері» инженерлік бейіндегі зертхананың ғылыми қызметкері, техника ғылымдарының магистрі Рахметулла Жаппарбергенов баяндады.

Университет ғалымдары жаңа мазмұндағы жобаларды әзірлеп, ғылымды дамытудағы жетістіктері арқылы Сыр өңірінің инновациялық дамуына лайықты үлесін қосып келеді. Алдағы уақытта да ғалымдарымыздың үлесі еселене береді.

Конференция соңында бір топ ғалымдар мен ғылыми қызметкерлер жемісті еңбегі үшін марапатталды.