• 01 қыркүйек 2024
• 930

Жаңа оқу жылы жаңашылдыққа толы

Қорқыт ата атындағы Қызылорда университетінде 30 тамыз – ҚР Конституциясы күні және 1 қыркүйек – Білім күніне орай салтанатты жиын өтті. Мерекелік шарада Басқарма Төрағасы-Ректор Бейбіткүл Сәрсемханқызы Конституция талаптарының орындалуы – мемлекет дамуы мен қоғамдағы азаматтық келісімнің негізі екенін айтты.  Сонымен қатар, оқытушы-профессорлар мен білім алушыларды жаңа оқу жылының басталуымен құттықтады.

«Былтыр QS британдық агенттігінің рейтингісі бойынша Қорқыт ата атындағы Қызылорда университеті алғаш рет әлемдік мықты жоғары оқу орындарының қатарына кірді. Сонымен қоса, Бірлескен ұлттар ұйымының Тұрақты даму мақсаттарын дамыту бойынша биыл алғаш рет Times Higher Education әлемдік ЖОО рейтингінен орын таптық. Қазіргі таңда университетте 113 білім беру бағдарламасы бойынша 10 мыңнан астам студент білім алып, 500-ден аса профессор-оқытушы құрамы қызмет етеді»,-деді Бейбіткүл Кәрімова.

Президенттің тапсырмасы бойынша Сеул ұлттық ғылым және технологиялар университетімен бірлесіп «Жасанды интеллект және информатика» институты ашылып, жаңа оқу жылында алғашқы білім алушыларын қабылдады. Ағымдағы оқу жылына ҚР ҒЖБМ 100 грант бөлінді. Келесі оқу жылынан бастап «қос диплом» бағдарламасы жүзеге асырылады.

Жыл сайын білім алушылар саны артып келеді. Соңғы 3 жылда студенттердің контингенті 33%-ға артты. Биылғы 2024-2025 оқу жылына 3205 білім алушы қабылданып, оның 1315-і білім грантын иеленді. 
Айта кетейік, жаңа оқу жылында жатақхана мәселесі толық шешімін тапты. Қазіргі таңда 1460 орындық 7 жатақхана жұмыс істейді. Сонымен қатар, 50 орындық коворкинг-орталығы бар асхананың құрылысы жүргізілуде.

Салтанатты шарада  жоғары білікті мамандар даярлауда еңбек етіп жүрген және оқу орнының стратегиялық дамуына үлес қосқан университеттің бірқатар қызметкерлері марапат төрінен көрінді.
Жиынға Қызылорда облысы әкімінің орынбасары Шахмардан Байманов, зиялы қауым өкілдері, университет ардагерлері, оқытушы-профессорлар мен университет түлектері және білім алушылар қатысты. Салтанатты шара «Томирис» халықтық би ансамблі, университет түлектері мен білім алушыларының мерекелік концертімен қорытындыланды.