• 10 қазан 2024
• 400

Қорқыт ата университетінде Эразмус+ бағдарламасының ақпараттық сессиясы өтті

Қорқыт ата атындағы Қызылорда университетінде Еуропалық Одақтың Эразмус+ бағдарламасы бойынша ақпараттық сессия ұйымдастырылды. Іс-шараға Қазақстандағы Эразмус+ бағдарламасының Ұлттық кеңсесінің үйлестірушісі Лаура Палуанова,  университеттің академиялық мәселелер жөніндегі проректоры Дана Абдрашева, профессор-оқытушылар мен студенттер қатысты.

Ақпараттық сессия барысында Лаура Қалабайқызы баяндама жасап, халықаралық кредиттік ұтқырлық бағдарламалары, Эразмус Мундус бірлескен магистірлік бағдарламалары, жоғары білім әлеуетін арттыру және Жан Моне жобалары туралы жан-жақты ақпарат берді. Сонымен қатар, қатысушыларға Эразмус бағдарламалары аясында бәсекеге қабілетті жобалық өтінімдерді қалай дайындау керектігі түсіндірілді.

«Жобалардың басты мақсаты - әлеуетті арттыру. Бұл жоғары оқу орындарының, оқытушылардың және студенттердің мүмкіндіктерін дамытуға бағытталған. Студенттер Еуропада магистратура бағдарламаларына тегін қатысып, бірнеше елде білім алу мүмкіндігіне ие. Эразмус бағдарламасы арқылы әр семестрде түрлі еуропалық елдерде оқуға болады. Екі жыл ішінде студент 2-3 еуропалық елде білім ала алады»,-деді Лаура Палуанова.

Бұл сессия оқытушылар мен студенттерге шетелдік оқу орындарымен ынтымақтастық орнатуға және халықаралық білім беру бағдарламаларына қатысу мүмкіндіктері туралы толық ақпарат алуға мүмкіндік береді. Эразмус+ бағдарламасы Қазақстан мен Еуропа арасындағы білім беру және мәдени байланыстарды нығайтуға айтарлықтай үлес қосуда.