• 16 қазан 2024
• 713

Ерсайын Абадатдинұлы: “Қазақстанды сағындым”

Қорқыт ата атындағы Қызылорда университетінің студенті Ерсайын Абадатдинұлы 2024 жылдың күзгі семестрінде Бельгияда білім алу мүмкіндігіне ие болды. Бұл оның шет елге алғаш шығуы және алған әсері ерекше болғанын айтады.

Ерсайынның айтуынша, ол студенттермен бірге хостелге орналасқан. “Қабылдау жағы жылы әрі қонақжай болды. Қызметкерлер кез келген сұраққа жауап беріп, көмек көрсетуге дайын тұрады. Алғашқы аптада жаңа ортаға бейімделіп, сабақтардың орналасқан жерін анықтап, күнделікті қажеттіліктерге дұрыс шығындалуды үйрендік. Бельгия көшелерінде 18 ғасырдың ғимараттарының қазіргі заманғы стильмен үйлесуі ерекше әсер қалдырды”, -деді кейіпкеріміз.

Алғашқы дүкен аралау сәті де таңғалдырарлық болған. Ерсайын азық-түлікті еуромен сатып алып, Қазақстандағы бағалармен салыстырып көрген. Сонымен қатар, жергілікті тұрғындармен қарым-қатынас жасау оңай әрі жағымды болғанын, олардың ағылшын тілін жақсы меңгергенін және жылы шыраймен қарсы алғанын ерекше атап өтті.

“Мен үшін қуанышты сәттердің бірі – группаластарымның арасынан Алматыдан келген қазақ жігіті Аленді кездестіруім болды. Туған жерді сағынғанда қазақша ән шырқап, сағынышымызды басамыз. Қазақстанды сағындым. Ең қиыны шетелде біздің ұлттық тағамдардың жоқтығы, басқасы басқа туған жердің дәмін, тамағын ештеме алмастыра алмайды екен”, - деп елге деген сағынышын жеткізді.

Ерсайынның айтуынша, Бельгиядағы оқудың басты артықшылығы – білім сапасы мен жаңа мүмкіндіктер. Елден жырақта жүрген Қорқыт ата атындағы Қызылорда университетінің студенті  Эразмус+ Халықаралық кредиттік ұтқырлық бағдарламасы аясында білім алып, өз еліне жоғары біліммен оралады деген сеніміміз мол!