• 21 қазан 2024
• 649

CONNECTED-2024: Қазақстанның білім беру хабына айналуының жаңа кезеңі

Астанада өткен «CONNECTED-2024» халықаралық конференциясы аясында ұйымдастырылған Стратегиялық әріптестер форумы Қазақстанның жаһандық білім беру орталығы ретіндегі рөлін нығайтуға бағытталған маңызды қадам болды. Форумға 20-дан астам елден 1500-ге жуық делегат, жоғары оқу орындарының өкілдері мен халықаралық серіктестер қатысты.

Форумның негізгі тақырыбы – «Білім және болашақ ғылымы» болып, ҚР Ғылым және жоғары білім министрі Саясат Нұрбектің модераторлығымен өтті. Жиында жоғары білім беру саласының дамуындағы өзекті мәселелер, сын-қатерлер мен болашақ мүмкіндіктері талқыланды. Қатысушылар білім мен ғылым саласындағы халықаралық ынтымақтастықты дамыту жолдарын талқылап, тәжірибе алмасты.

Министр Саясат Нұрбек өз баяндамасында Қазақстанның білім беру жүйесін нығайтудағы серіктестіктердің рөліне тоқталып, елімізді Орталық Азия мен Еуразияның білім беру хабына айналдыруға деген мақсаттарын атап өтті. Қазақстанның жаһандық білім беру орталығына айналуына мүмкіндік беретін жаңа серпін – бұл форумның басты нәтижелерінің бірі болмақ.

Форум барысында халықаралық әріптестік саласындағы маңызды келісімдер де сөз болды. Атап айтқанда, Сеул Ұлттық Ғылым және Технологиялар Университетінің вице-президенті доктор Тэйхи Ким өз баяндамасында SeoulTech пен Қорқыт ата университеті арасындағы ынтымақтастықты ерекше атап өтіп, 2025 жылы басталатын 2+2 Қос диплом бағдарламасы туралы айтты. Бұл бағдарлама қазақстандық студенттерге Қазақстан мен Оңтүстік Кореяда қатар білім алу мүмкіндігін ұсынады және жоғары технологиялар саласындағы мамандарды халықаралық деңгейде даярлауға жол ашады.

Айта кету керек, Қорқыт ата университеті мен Польшадағы Быдгощ Экономикалық университеті (WSG) арасында маңызды ынтымақтастық туралы келісімге қол қойылды. Бұл келісім бірлескен ғылыми зерттеулер мен білім беру жобалары арқылы Қазақстан мен Польша арасындағы халықаралық серіктестікті жаңа деңгейге көтеруге мүмкіндік береді.

Осындай стратегиялық бастамалар Қазақстанның білім беру жүйесінің әлемдік аренадағы беделін арттырып, халықаралық әріптестікті нығайтуға ықпал ететіні сөзсіз.