• 21 қазан 2024
• 162

Республика күніне арналған мерекелік концерт өтті

Қорқыт ата атындағы Қызылорда университетінде Республика күніне арналған «Қыран елім, тұран төрім – Қазақстаным» атты мерекелік концерт өтті. 

Қызылорда облыстық симфониялық оркестрінің жетекшілігімен өткен мерекелік кештің көркемдік жетекшісі әрі бас дирижері – Қазақстанның еңбек сіңірген қайраткері Мүсілім Әмзе. 

Мерекелік концерт Қазақстан Республикасының Мемлекеттік гимнімен басталып, Басқарма Төрағасы-ректор Бейбіткүл Каримованың құттықтауымен жалғасты. 

Концерт барысында көрермендерге қазақ және әлемдік классикалық музыка туындылары ұсынылды. Бірінші болып сахнаға Руслан Ахметов шығып, «Нұртуғанның термесін» орындады. Бұл шығармадан кейін дирижер Рустам Рысмағамбетов  басшылығындағы оркестр Джоаккино Россинидің атақты «Вильгельм Телль» операсының увертюрасын орындап, кешке әсерлі реңк берді.

Концерт бағдарламасы жан-жақты әрі мазмұнды болды. Латиф Хамидидің «Қазақ вальсі» шығармасын Мақпал Шакирова орындап, көрерменді ұлттық әуенмен тербеді. Болат Күзембаевтың орындауындағы А.Жайымовтың «Шалқыма» ұлттық нақыштағы әуендерді көрермендерге жеткізсе, Наку Мирмановтың А.Фоссеннің «Карусель» шығармасын орындауы концерттің көркемдігін арттыра түсті.

Концерт шарықтау шегіне жеткенде Евгений Музыканттың орындауындағы Пабло де Сарасатенің «Сыған әуендері» тыңдармандарды ерекше әсерге бөледі. Бұдан әрі кешті А. Ишмухамедов пен А.Толықбаевтың «Ұлытау» шығармасы жалғастырып, ұлттық рух пен тарихи мұраны дәріптеді.

Кештің соңында әлемдік классика да назардан тыс қалмады. Л.Андерсонның «Фидл-Фадл» шығармасын, А.Арутюнянның «Экспромтын» және И.Штраустың әйгілі «Радецкий маршын» оркестр жоғары деңгейде орындады.

Кеш соңында Нұрғиса Тілендиевтің «Махамбет» поэмасынан үзінді орындап, мерекелік кешке патриоттық рух берді.