• 23 қазан 2024
• 415

Кореядағы студенттік өмір: Әйгерім Менлібекпен сұқбат

Қорқыт ата атындағы Қызылорда университетінің студенті Әйгерім Менлібек 2024 жылдың күзгі семестрінде Оңтүстік Кореядағы Каннам университетінде академиялық ұтқырлық аясында білім алуда. Бұл сұқбатта ол Кореядағы оқу процесі, мәдениеті және студенттік өмірі жайлы өз тәжірибесімен бөлісті.

Әйгерімнің айтуынша, Кореяда студенттер оқитын пәндерін, уақытын және күнін өздері таңдай алады. Бір сыныпта әртүрлі курстардың студенттері болуы мүмкін, ал оқу процесі студенттердің өз бетімен білім алуына бағытталған. Әр семестрде  белгілі бір баллдар мен кредиттер жинау міндетті. Оқу жылында бірінші семестр көктемде, екінші семестр қыркүйекте басталады.

Біздің кейіпкеріміздің студенттік өмірі де белсенді өтуде. «Университетте үнемі іс-шаралар, акциялар және түрлі ойындар өткізіледі. Қыркүйек айының соңында студенттік фестивальде  танымал әншілер мен бишілер қатысқан концерттер ұйымдастырылды. Сонымен қатар, тамақ сататын көліктер мен студенттерге арналған арнайы орындар болды. Жатақханада екі айда бір рет түрлі сыйлықтар ойнатылып, тегін тамақ таратылды»,-деді Әйгерім.
Әйгерім қазіргі уақытта Кореяның танымал мәдениеті, дәстүрлі мәдениеті мен контенті, кәріс тілінің оқылымы, тыңдалымы және академиялық ағылшын тілдерін оқуда. Ол қытай, кәріс студенттерімен достасып, олармен Сеуілді бірге аралап, қызықты сәттерді бастан кешуде.

«Кореяда барлық іс-шаралар халық үшін ұйымдастырылады. Мен көптеген шараларға күтпеген жерден қатысып, шетелде өмір сүруден барынша пайдалы тәжірибе алуға тырысып жүрмін»,-деді Әйгерім.
Сабақтан тыс уақытта Әйгерім Сувон, Сеул, Йоннин және басқа қалалардың көрікті жерлерімен, сол жердің тарихымен танысып, өз уақытын тиімді өткізеді. Оқуын аяқтағаннан кейін IELTS және TOPIK-2 тапсыруды жоспарлауда. «Егер мүмкіндік болса, магистратурада оқуымды жалғастырғым келеді. Өзімді дамытып, сұранысқа ие маман болу – менің басты мақсатым»,-деп атап өтті Әйгерім.

Әйгерімнің Кореяда өткізген уақыты мен тәжірибесі оның болашағына жаңа мүмкіндіктерге жол ашсын деп тілейміз! Біз Әйгерімнің оқу жолындағы жетістіктеріне және еліміздің дамуына қосар үлесіне үлкен сенім артамыз.