• 20 қараша 2024
• 114

Руслан Бақбергенұлының Польшадағы тәжірибесі

Қорқыт ата атындағы Қызылорда университетінің студенті Руслан Бақбергенұлы академиялық ұтқырлық бағдарламасы аясында Польшада білім алып,  тәжірибе жинауда. Шетелде оқу тек білім алумен шектелмей, жеке тұлғалық дамуға, жаңа мәдениеттермен танысуға және болашаққа жоспар құруға мүмкіндік береді.

Польшаға алғаш келген сәт Руслан үшін ұмытылмас болыпты. “Өзіңді ерекше сезінесің, бірақ іштей біртүрлі сенбестік те бар,” – деп еске алды. Алғашқы күндері жат ортаға үйренісу оңай болмаған. “Неге келдім деп ойлаған кездерім де болды, бірақ уақыт өте барлығы өз орнына түсті. Бейімделу үшін тек уақыт қажет екен,” – дейді.

Қазақстан мен Польша арасындағы білім беру жүйесінде айтарлықтай айырмашылық байқалмаған. “Сабақтардың мазмұны бірдей, бірақ шетелде оқу жауапкершілікті күшейтіп, өз бетіңше шешім қабылдауға үйретеді,” – дейді. Сонымен бірге, магистратурада шетелде оқуға қызығушылық танытып, болашақ жоспарларын да айқындауда.

Русланның айтуынша, Польшада халықаралық ортаға еніп, түрлі елдерден келген студенттермен тығыз қарым-қатынас орнатқан. “Италиядан, Колумбиядан келген достарым бар, жатақхана көршілеріммен жақсы қарым-қатынастамын,” – дейді.

Сонымен қатар, тілдік кедергілер де болған. “Speaking деңгейім бастапқыда төмен еді, бірақ уақыт өте келе сөйлесу арқылы жақсарып келеді,” – деп бөлісті.

Польшада жүргенде студент көптеген тың идеялар ойлап тапқанын, оларды Қазақстанға оралған соң іске асыруды жоспарлағанын жеткізді. “Қазақстан мен Польша арасында кейбір ұқсастықтарды ұштастыруға болады. Мысалы, қоғамдық көлік жүйесін дамыту немесе демалыс мәдениетін енгізу. Бірақ мәдениетімізге ешқандай ұлт жетпейді деп ойлаймын,” – дейді.

Шетелде оқу Русланның білім көкжиегін кеңейтіп, жеке тұлға ретінде дамуына зор ықпал етуде. Польшадағы тәжірибесі оның өмірге деген көзқарасын өзгертіп, болашаққа нақты мақсат қоюына себепкер болды.