• 20 қараша 2024
• 126

Студенттер республикалық футбол турнирінде жеңімпаз атанды

Шымкент қаласында “Мұғалім жұлдыздары” атты республикалық футбол турнирі ұйымдастырылды. Ең алдымен, еліміздің әр көкжиек тұсында аймақтық кезең өткізілді. Нәтижесінде оңтүстік аймақтық кезеңде Қызылорда қаласы жеңімпаз атанып, республикаға жолдама алды. Ақтық кезеңге 6 аймақтан 6 команда қатысты. Атап айтсақ, Алматы, Семей, Өскемен, Қарағанды, Түркістан және Қызылорда облысының студенттері бақ сынады.

Футбол турнирі алдында пресс-конференция өткізіліп, жеребе таратылды. Қорқыт ата атындағы Қызылорда университеті “Ыбырай” педагогикалық ұйымының студенттері А тобына түсіп, алғашқы кездесуін өскемендік аяқ-допшылармен бастады. Алғашқы кездесу 1:0 есебімен аяқталып, сыр бойылық студенттер алдыға шықты. Екінші кездесуде студенттеріміз 2:0 есебімен алматылықтарды ойсырата жеңіп, ширек финалға 1 орынмен өтті.

Бұл кезеңде семейлік студенттермен бәсекеге түсіп, айып добы арқылы жеңімпаз атанды. Осылайша, қызылордалық жастар ақтық мәреге жетті. Финалдық кездесу қайтадан өскемендік аяқ-допшылармен болды. Нәтижесінде бұл турнирде аталған облыстың студенттерін екінші мәрте жеңіп, алтын жүлдеге ие болды. Сонымен қатар, турнирдің “үздік қақпашысы” номинациясын 2-курс студенті Бағдат Ботабай еншіледі.