• 27 қараша 2024
• 286

«ТАЗА ҚАЗАҚСТАН» жобасы аясында ботаникалық бақ және жылыжай шаруашылығы ерекше назарда

Қазақстандағы экологиялық ахуал мен ауыл шаруашылығын тұрақты дамыту мақсатында елімізде әртүрлі жобалар мен бастамалар қолға алынуда. Солардың бірі — «Таза Қазақстан» жобасы. Бұл бастама қоршаған ортаны қорғау, экологиялық білім беру және табиғи ресурстарды тиімді пайдалану бағытында маңызды қадам болып табылады. Жоба аясында Қорқыт ата атындағы Қызылорда университеттеті жанынан ашылған  ботаникалық бақ және жылыжай шаруашылығы ерекше назарда.

Қазіргі таңда Қорқыт ата атындағы Қызылорда университетінің ботаникалық бағында 2 мыңнан аса сәндік және жеміс ағаштары бар. Ботаникалық бақтың жалпы көлемі 4 гектар жерді құрайды.

Бүгінде ботаникалық бақты көгалдандырып, оған түрлі жеміс және сәндік екпе ағаштарын көптеп отырғызуға ерекше ден қойылып келеді. Ботаникалық бақ биыл толықтай қайта жаңартудан өтті. Тұрғындардың жүріп-тұруына қолайлы болу үшін тас төсеніштер төселіп, шатыр орнатылды. Сондай-ақ, жаңадан егілген көшеттерді тамшылатып суару үшін топырақ үстімен және астымен арнайы құбыр жүргізілген. Мамандар климатқа төзімді әрі топырағы құнарлы ағаштарды жерсіндіріп жатыр.

Бұдан бөлек, 2024 жылдың шілде айынан бастап жылыжай шаруашылығы іске қосылды.  Бірінші айналымда қияр егіліп, бүгінде өнім толықтай жинап алынды. Алдағы уақытта көк шөп пен гүлдің бірнеше түрін егу жоспарлануда. Қазіргі таңда көктемге дайындық жұмыстары жүруде. Мамандар ағаштарды қысқы ұйқыға дайындап, шықпай қалған ағаштардың орнына көктемде жаңа көшеттерді егу жоспарлауда.