• 28 қараша 2024
• 341

Американдық профессор ғылыми тәжірибесімен бөлісті

Қорқыт ата атындағы Қызылорда университетінің Академиялық мәселелер бойынша басқарма мүшесі Дана Абдрашева американдық Корнелл университетінің профессоры Джон Каразерспен кездесті.

Бұл профессор Джон Каразерстің Сыр еліне екінші сапары. Кездесуде екі жақты ынтымақтастықты дамыту және ғылыми-зерттеу бағыттарында өзара тәжірибе алмасу туралы баяндалды. Ол өзінің зерттеу салалары, әсіресе аймақтық даму және жоғары білім беру жүйесіндегі инновациялық әдістер туралы айтып, университетпен бірлесіп жұмыс істеуге дайын екендігін жеткізді. 

Джон Каразерс - 2016 жылы жоспарлау педагогы үшін үздік көшбасшылық сыйлығымен марапатталған. Ал 2019 жылы GW ең жоғары Джордж Вашингтон академиялық марапатын иеленген. Сондай-ақ, Батыс аймақтық ғылыми бірлестігінің басқарма мүшесі.

Оның зерттеулері жетекші журналдарда жарияланған, соның ішінде Environment and Planning B, International Regional Science Review, Journal of Economic Geography, Journal of Regional Science және т.б.

Бұдан бөлек, ол аймақтық және қала құрылысы бойынша озық зерттеулерді жариялайтын аймақтық даму саласындағы ең ықпалды журналдардың бірі «Growth and Change» журналының бас редакторы.

Бұл кездесу Қорқыт ата атындағы Қызылорда университеті мен Корнелл университеті арасындағы ынтымақтастықтың жаңа кезеңін бастауға негіз болды.

Корнелл университеті - Америка Құрама Штаттарының жетекші университеттерінің бірі және QS WUR рейтингінде 16-шы, Times Higher Education рейтингінде 20-шы орында.

Сапар аясында шетелдік ғалым оқытушылар мен білім алушыларға жоғары рейтингті журналдарға ғылыми мақалалар жазу бойынша семинар өткізді.

Айта кетейік, профессордың сапары Қазақстан Республикасы Ғылым және жоғары білім министрлігінің шетелдік профессорларды қаржыландыру бағдарламасы аясында ұйымдастырылды.