• 03 желтоқсан 2024
• 82

Тілтанушы Рабиға Сыздықтың 100 жылдығына арналған ғылыми конференция

Қорқыт ата атындағы Қызылорда университетінде тілтанушы, ғалым Рабиға Сыздықтың 100 жылдығына арналған «Сөз құдіреті және Рабиға Сыздық әлемі» атты республикалық ғылыми-тәжірибелік конференция өтті.

Конференцияны Білім беру бағдарламасының жетекшісі, қауымдастырылған профессор, филология ғылымдарының кандидаты Әсия Алмауытова жүргізді. Алғашқы сөзді Абай атындағы Қазақ Ұлттық педагогикалық университетінің профессоры, филология ғылымдарының докторы Қалбике Есенова алып, «Академик Рабиға Сыздықтың тілтанымдық тұлғасы» тақырыбында баяндама жасады. Ол ғалымның қазақ тілін зерттеудегі теңдесі жоқ еңбектерін атап өтіп, оның қазақ әдебиеті мен мәдениетіне тигізген ықпалын ерекше бағалады.

Қорқыт ата университетінің Қазақ тілі мен әдебиеті және журналистика кафедрасының қауымдастырылған профессорлары, филология ғылымдарының кандидаттары Гүлмира Баялиева мен Аман Абасилов өз баяндамаларында Рабиға Сыздықтың қазақ әдеби тілі мен оның тарихын зерттеудегі рөліне тоқталды. Гүлмира Баялиева «Рабиға Сыздық және қазақ әдеби тілінің мәселелері» тақырыбын қозғап, ғалымның әдеби тілдің қалыптасуы мен дамуына қосқан үлесін талдаса, Аман Абасилов «Рабиға Сыздық және қазақ әдеби тілі тарихы: дәуірленуі мен нормалануы» баяндамасында қазақ тілінің тарихи кезеңдерін ғылыми тұрғыдан саралады.

Конференция барысында студенттер де ғалымның еңбектеріне қызығушылық танытып, баяндамалар мен пікірталастарға белсенді қатысты. Олар Рабиға Сыздықтың ғылыми мұрасының қазіргі тілтану саласы үшін маңыздылығын түсініп, өз көзқарастарын білдіруге мүмкіндік алды.