• 06 желтоқсан 2024
• 457

Әскери-патриоттық тәрбие бойынша қалалық семинар өтті

Қорқыт ата атындағы Қызылорда университетінде  Тәуелсіздік күні мерекесінің 33 жылдығы қарсаңында «Қазақстанда жастарға әскери-патриоттық тәрбие беру: жетістіктері мен проблемалары» тақырыбында ғылыми-тәжірибелік семинар өтті.

Семинар модераторы — әскери кафедра бастығы, полковник Нұрсейт Увайдаев. Алғашқы баяндаманы отставкадағы майор, әскери кафедраның аға оқытушысы Биболат Ердіғаликов жасады. Сонымен қатар, Варшава келісім шарт әскери тобының директоры Алтынсары Шүренов, «Застава Тарландары» РҚБ төрағасы Асан Худояров, Қызылорда гарнизоны әскери бөлімдерінің офицерлері және әскери кафедра оқытушылары сөз сөйледі.

Жиында әскери-патриоттық тәрбие беру саласындағы жетістіктер мен мәселелер кеңінен талқыланып, бірқатар ұсыныстар айтылды. Тарих және археология білім беру бағдарламасының жетекшісі Қыдырбай Өткелбаев әскери-патриоттық тәрбиенің тарихи маңызына тоқталса, «Қазақстан халқы Ассамблеясы» орталығының басшысы Айтжан Оразбақов жастардың идеологиялық дайындығын күшейту жолдарын ұсынды.

Әлеуметтік және тәрбие жөніндегі проректор Жандос Базартай университетте әскерден оралған 11 студенттің тегін оқып жатқанын атап өтіп: «Университет тарапынан барлық қолдау көрсетіледі, студенттер тест тапсырмай, сұқбаттасу арқылы қабылданады», – деді.

Семинар барысында әскери кафедра оқытушылары мен студенттерінен, Қызылорда гарнизонының бөлімшелерінен және колледждерден бірнеше мақала ұсынылды. Қорытынды сөзінде полковник Нұрсейт Увайдаев жастардың әскери-патриоттық тәрбиесін дамыту бойынша 6 нақты ұсынысты қабылдады.

Іс-шараға Қызылорда гарнизонының әскери бөлімдерінің өкілдері, университет басшылығы, оқытушылар құрамы, Ауған соғысының ардагерлері, «Застава Тарландары» және «Қарулы Күштер ардагерлері» қоғамдық бірлестіктерінің жетекшілері, колледж оқытушылары, әскери кафедра студенттері мен шекара қызметінің жас сарбаздары қатысты.

Қазіргі уақытта әскери кафедрада 247 студент білім алуда. Жыл сайын орта есеппен 120 студент оқуын аяқтап, 130-140 студент жаңа оқу жылына қабылданады. Әскери кафедра екі бағдарлама бойынша білім береді: запастағы лейтенант және запастағы сержант.

Запастағы лейтенант бағдарламасы бойынша студенттер 2 жыл оқиды, ал запастағы сержант бағдарламасы 1 жылға созылады. Әскери кафедраны аяқтаған студенттер запастағы лейтенант шенін алып, офицер болу мүмкіндігіне ие болады.

 Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru